Jowai, Naitung 01
Ka jingther jur u slap ka la wanrah biang ka jingtwa ha ka surok bah NH-6 ha Lumshnong hajan ka khyrdop toll gate bad ka jingshlei um ha suroh bah ha Myn-kre, East Jaiñtia Hills District kaba la wanrah ka jingsahkut kali na baroh liang surok.
Kane ka jingtwa ka la jia ha ka por mynsngi jong ka 1 tarik Naitung.
Kane ka jingtwa khyndew ha kane ka jaka haduh mynta ka NHAI kam lah satia ban weng ïa ka bad ka um kaba tuid halor ka surok ka la buh jingma ïa ka ïaid ka ïeng jong ki kali.
Ki pulit jong ka East Jaiñtia Hills District ki la hap ban trei shitom hapdeng u slap ba jur ban pynïaid ïa ki kali. Hynrei wat hapdeng ka jingjulor jong ka surok ki don ruh ki nongñiah trok kiba khlem akor ban tam shakhmat (overtake) bad pynlong shuh shuh ka jingdheng kali kaba jur bad buh jingeh haduh katta katta ïa ki paidbah nongleit-nongwan na kane ka surokbah.
