Nongpoh, Naitung 01
Ka jingther jong u slap ha kine ki ar sngi kynthih, ka la wanrah ïa ka jingtwa khyndew ha ki bynta jong ka surokbah NH-6 ha Ri-Bhoi, kaba la ktah shi katdei eh ïa ka leit ka wan jong nongleit jingleit.
Ha ka step jong ka Lah Sngi U Blei, kawei ka bynta jong ka surokbah National Highway-6 ha Umran, Ri Bhoi District ka la shah tap noh ha ka khyndew kaba la twa kynsan hadien ka jingther jong u slap. Kane ka jingtwa khyndew ka dei ha ka bynta jong ka surok kaba kiew na nongbah Guwahati sha Shillong.
Katei ka jingtwa khyndew ka la wanrah ruh ïa ka jingdheng kali kaba shipor ha katei ka jaka bad na ka liang jong ki pulit ka Ri Bhoi ki la hap ban pynïaid noh ïa ki kali tang shiliang jong ka surokbah. Na ka liang jong ki bor ba dei khmih ka National Highway Authority of India (NHAI) ki la poi ha katei ka jaka ban weng bad khat noh ïa ka khyndew khnang ba kan ym don kano-kano ka jingthut ha ka leit ka wan jong ki paidbah.
Shuh shuh, na ka liang ki pulit ka district ki la kyntu ruh ïa ki paidbah nongleit nongwan ba ki dei ban kham husiar ha kum kane ka por slap namar ka jingtwa khyndew, ka jingkhyllem jong ki dieng ki siej, khnang ban lait na kino-kino ki jingjia sngewsih.
