Shillong, Naitung 01
Ka Hynñiewtrep National Liberation Council (HNLC) ka la pynpaw ka jingkmen bad ban ai ka jingïaroh ïa ka rai jong ka Google ban ai jingithuh ïa ka ktien Khasi, bad kynthah tyngeh ïa ka Sorkar Kmie kaba haduh mynta kam lah ban pynurlong ne pynrung ïa ka ktien Khasi ha ka Khyrnit Ba Phra jong ka riti synshar ka ri India kumba la mih ka jingdawa.
Ha ka kyrwoh khubor kaba la pyllait ha ka Lah Sngi U Blei ha ka ktien nongwei, u General Secretary-cum-Publicity Secretary ka seng u Bah Saiñkupar Nongtraw u la ong, “Ka HNLC ka dap da ka jingkmen halor kane ka jingpynbna ïa ka jingai jingithuh da ka Google ïa ka ktien tynrai ka jong ngi, kaba pyni ïa ka jinglong kongsan ban ïada bad lehkmen ïa la ka ktien ka thylliej. Kane ka pynpaw ruh ïa ka jingangnud jong ka, ban pynneh ïa ka ktien Khasi bad ka jingïasoh jong ka bad ka kolshor jong ka jaidbynriew. Ka HNLC ka ong ruh ba ka jingithuh jong ka Google ka pyni ba ka don ka jingdawa jong ka pyrthei hi baroh kawei ïa ki kyntien bapher bad ka dawa ruh ïa ka Sorkar India ba kan ai jingkyrshan ka jingithuh ïa katei ka ktien ban nang pynkhlaiñ ïa ka kolshor, ka jingïadei ha ka imlang sahlang bad ban ïada ïa ka ktien.
Ka HNLC ka la ther ruh ïa ka jingpynslem jong ka Sorkar Kmie ban ai jingithuh ïa ka ktien Khasi, bad ong ka jingbym lah jong ka Sorkar ban ai jingithuh ïa ka ktien tynrai ka pyni ïa ka jingthmu ban tyllep, pynduhjait bad pyndkut ïa u ‘sai bteng ha ka tynrai da kaba pyndkoh ïa ka jinghikai bad pyndonkam ïa la ka jong ka ktien ka thylliej.
Shuh shuh ha ka kyrwoh, u Bah Saiñkupar u la ong, ka jingkyrpad dang shen jong u Myntri Rangbah u Conrad K Sangma ïa ka Google ba kan ai ka jingithuh ruh ïa ka ktien Garo, ka la buh jingkylli bad jingsngewkhia halor ki mat ba hakhmat ki jong u. Kaba donkam eh ïa mynta ïa u Myntri Rangbah ka long ba u dei ban phai khmat ha ka ban kyntu ïa ka Sorkar Kmie ba pynrung noh ïa ka ktien Khasi bad Garo ha ka Khyrnit ba Phra ha ka jaka ban pyrshang leh ïa ka kam ban pynmyntoi shimet.
Ka kyrwoh ka ong ruh ba napdeng ki 7 hajar tylli ki kyntien ba la kren ha satlak ka pyrthei bad napdeng ki 700 tylli ki kyntien ha India, ka ktien Khasi ka la ïoh ïa ka jingithuh na ka Google bad kane ka pyni ïa ka jingkot sha u mawmer ban sah jingkynmaw.
Haba ïadei bad ka ktien Khasi, u Bah Saiñkupar u la ong ba ka UNESCO ka la ai jingithuh ïa kane ka ktien ha u snem 2012 kum ka ktien kaba don jingma ba lah ban duh jait noh bad ka jingkylli mynta ka long haduh katno kan lah ban ïai neh khlem ka jingithuh jong ka Sorkar.
