Shillong, Naitung 02
Ka lympung ïalehkai State Level Subroto Mukherjee Football Cup 2024 ban pynïaid da ka tnat ïalehkai jong ka Sorkar Jylla kan sdang naduh 9 tarik mynta u bnai ka ban pynlong ha lai tylli ki madan ïalehkai kiba don ha kane ka nongbah.
Kine ki madan ïalehkai ki kynthup ïa ka SSA Stadium kaba ha First Ground, kumjuh ka madan Third Ground kiba ha Polo lem bad ka madan Heh Mini Stadium kaba ha Mawlai Phudmuri.
Ha kane ka lympung yn wan ïashim bynta da ki skul bapher bapher kiba la rah ïa ka nam lahduh na baroh ki District jong ka Jylla ha ki kyrdan ïalehkai Under-17 ki kynthei bad shynrang lem bad ka Under-15 ki shynrang.
Kat kum ki khubor lyngba ka tnat ïalehkai la ong ba naduh ka jingïalehkai quarter final haduh ka final yn pynlong noh tang ha madan First Ground. Ïa kane ka lympung yn pynkut ha ka 13 tarik mynta u bnai.
Ki kynhun ki ban khur ïa ka nam lahduh ha kane ka kynti kaba mynta kin ïoh ban mihkhmat ïa ka Jylla sha ka 63rd International Subroto Mukherjee Cup ka ban sa long shen ha nongbah Delhi.
