Mawkyrwat, Naitung 02
Hadien ba shong dum khlem bording ilektrik haduh 16 sngi na ka daw ka jingduh noh jong u Transformer, ki paidbah nongthang bording ilektrik jong ka Mawkyrwat ryngkat ki nongshong ïew namar ka jingsngew sohsat ha ka 2 tarik u Naitung 2024 ki la mih paidbah ban leit tur sha shlem treikam MeECL Mawkyrwat Division ban dawa bujli noh ïa u transformer.
U Bah Mihsalan Khar Turnia uwei na ki samla rangbah jong ka dong Mawkyrwat haba ïakren bad ki lad pathai khubor u la ïathuh ba hadien ka jingïalang kaba la long ha ka 1 tarik u Naitung 2024, da kawei ka sur ki paidbah ki la rai ban leit tur noh shapoh ophis MeECL.
Shuh shuh u la ïathuh ruh ba mynshwa ka la don teng ka jingduh u Transformer ha kane ka juh ka jaka bad tang hadien 4 sngi ki la ïoh da uwei. Kaba sngewsih ka long balei mynta pat haduh 16 sngi ba ki paidbah ki la shong dum, kane ka ophis ka sngap man-man bad ka ap haduh ba u paidbah un mih sha surok ban dawa.
U Bah Mihsalan u la ïathuh ruh ba hadien ba ki la dep ban buh ïa ka jingthoh hapoh ophis, na ka liang u engineer u la kular ba ha katei kajuh hi ka sngi un sa ai noh ïa u transformer bathymmai lada don ka kali ban kit.
Na ka liang ki paidbah nongthang bording ruh ki la rai ba lada ki jingkular jong u engineer kim urlong haduh ka 5 tarik, ki paidbah kin sa pynlong da ka jingshong kyllaiñ mungor hapoh katei ka ophis.
