Shillong, Naitung 02
Ka lympung ïalehkai 133rd Durand Cup kan sdang naduh 27 tarik mynta u bnai ha kaba yn pynlong ha ki saw tylli ki nongbah kata ha Kolkata, Kokrajhar, Shillong bad ha Jamshedpur ha kaba ki don 24 tylli ki kynhun ki ban ïaknieh ïa ka nam lahduh.
Wat la ka Jawaharlal Nehru Stadium kaba don ha kane ka nongbah ka dang slem ban pyndep ïa ka jingmaramot pynbha, hynrei ka Eastern Command jong ka Indian Army ka la rai ban pynlong ïa ki katto katne ki jingïalehkai ha ka nongbah Shillong bad ha kajuh ka por kan long ka sien kaba nyngkong ban pynlong ha Jamshedpur.
Kumba ka paw kane ka lympung ka dei kaba la rim bha ïa kaba la ju pynlong da ka Durand Football Tournament Society (DFTS) jong ka HQ Eastern Command. Naduh u snem ba la dep ki bor pyniaid ki la phai khmat ban pynlong sa ha ki nongbah jong ka thaiñ shatei lammihngi kata ha Kokrajhar kaba ha Assam naduh u snem ba la dep bad mynta pat ha Shillong.
Kitei 24 tylli ki kynhun ki ban ïashim bynta kin long na ka Indian Super League, I-League bad kiwei ki ban shah khot sngewbha ryngkat bad ki katto katne ki kynhun jong ki kynhun shipai. Kumba long ha u snem ba la lah, la khmih lynti ba kin don ki kynhun ïalehkai nabar ri ki ban wan ïashim bynta mynta u snem.
Ha kane ka lympung kin don haduh 43 tylli ki jingïalehkai ki ban pynïa-lehkai ha ka dur jong ka round-robin league-cum-knockout, ha kaba ïa ka jingïakhun final yn pynlong ha Vivekananda Yuba Bharati Krirangan (VYBK) kaba ha Kolkata. Ïa kitei 24 tylli ki kynhun yn phiah ha ki hynriew tylli ki group. Ki phra tylli ki kynhun ki ban wan ha ka kyrdan ba hakhlieh lem bad ar tylli kiba kynsai kin ïoh rung sha ka quarter final.
Kat kum ka jingpynïaid ia kane ka lympung, ka Kolkata kan pynlong ïa lai tylli ki group, katba ka Kokrajhar, Shillong bad ka Jamshedpur kin ioh ban pynlong mar kawei ka group. Ïa ki lai tylli ki trophy jong ka Durand Cup yn pyllait na ka nongbah Delhi ha ka 10 tarik mynta u bnai, hashwa ba kin poi sha Kolkata na ka bynta ka jingplie ïa kane ka lympung ka ban long ha ka 27 tarik ha VYBK.
Kumba ka paw ka Mohun Bagan Super Giant ka la long ka lahduh ha u snem ba la la lah bad kaba la bat haduh 17 sien.
