Jowai, Naitung 02
Ha ka sngi ba lai jong ka Behdeiñkhlam kaba pynlong da ka Seiñraij Jowai, ka la long kaba shongshit ha kaba la sakhi ba ki Kmai-raij bad ki Khon-raij ki la mih paidbah ban rah ïa ki deiñkhlam bad ïa ka symbud khnong bad khnong blai ha ka 2 tarik Naitung kaba dei ka sngi Musiang.
Ha ka por 9:30 mynstep, ki Khon Raij ki la rah shuwa ïa ka “Symbud Khnong” na jaka kyntang na Ïawmusiang ban pynïeng ïa ka ha Khliehshnong ha Chilliangraij bad hadien pat ki Kmai raij kin ïakynduh ha Mynkoipyrdi.
Ha ka por shiteng sngi, ki Kmai Raij ki la mih na Mynkoipyrdi ban pynhiar ïa ki Bom ki Bhuri bad ki bikur ban shad ha ki jaka niam kynthup ha Biar ka Blai, Datlawakor bad baroh ki jaka niam ha Iawmusiang.
Ki samla kynthei bad longkmie ha ki khor ki khriam tynrai kila mih paidbah sha Iawmusiang ban sakhi ïa ka jingrah diengkhlam bad khnong.
Ki khon raij shuwa ban rah ïa ka Khnong Blai sha madan Moosiem, kila rah ïa ka Khnong Blai na Loomsooiung ha Pohsawiar. U Dolloi ka Elaka Jowai u khlieh ka niam u la pyndep ïa ka suit ka shor bad ka nguh ka dem. U la ai ka pyrnah Khnong Blai ha u Kñi ka kur Nikhla ban pyndep ïa ka niam ka rukom bad hadien ba la pyndep ïa ka niam ka rukom, la rah ïa ka Khnong Blai sha madan Moosyiem ha kaba ïa ka lehniam yn pyndep da u Kñi ka kur Nikhla bad u Pator.
Hadien ka jingnguh jingdem ha Pohsawiar, ki Kmai-raij ruh kila rah la ka ki jong ki Dienkhlam jar jar la ki dong ki shnong.
Shuwa kane, la pyndep ïa ki jinglehniam bapher bapher naduh ka por 4 baje mynstep da kaba pynïeng ïa ka Deinkhlam ka Bon ha ïung Blai jong ki jait Rangad Wah ha Chilliangraij.
Ha kane ka juh ka por la pynïeng ruh ïa ka Deinkhlam ka Doh ha ïung Langdoh bad hadien pat ki thliew ïing ka Niamtre ki la pynïeng ïa ki Deinkhlam rit ha la ki iïng ki iïng ki jong ki.
Ka sngi kaba saw pat kaba dei ka sngi pynkut ïa ka Behdeiñkhlam, ha ka 3 tarik Naitung kaba dei ka sngi Muchai ha pung kyntang Aitnar.
