Shillong, Naitung 02
Ka Balarisuk Myria kaba dei na Nartiang, West Jaiñtia Hills District bad kaba dang shu pyndep ïa ka jingpule na St. Edmund Higher Secondary School, Shillong ha ka Science mynta u snem 2024 ka la wan ha ka kyrdan kaba khyndai ne 9th Position ha ka eksamin Higher Secondary School Leaving Certificate 2024 hadien ba la ïoh biang sa hynñiew mark na ka jingphah peit bniah biang ha shlem treikam jong ka Meghalaya Board of School Education (MBoSE).
Ka jingwan ha kane ka kyrdan kaba khyndai ha ka thup Top Ten ka dei hadien ba la ïoh biang ïa ka marksheet kaba thymmai na ka MBoSE ha ka Sngi Ba-ar ka 2 tarik Naitung 2024 hadien ba la phah peit bniah biang kaba la ïoh shuh sa 7 mark.
Haba ïakren bad ka Balarisuk Myria ka la ïathuh ba ha ka jingpynbna ka MBoSE ïa ka resol mynha ka 8 tarik Jymmang 2024 kam shym la wan ha ka Top-10 namar ka duna satang 3 mark hynrei mynta haba ka la phah peit biang ka la wan ha ka kyrdan kaba khyndai hadien ba ka la ïoh sa 7 mark.
Ka la ïathuh ba ha ka jingpynbna ba nyngkong ka ïoh 451 mark bad mynta ka la ïoh 458 mark.
“Nga sngewkmen haba nga ïoh ïa kane ka kyrdan kaba khyndai wat la nga la ïoh hadien shibnai tam hynrei nga don ïa ka thong ban long doktor, namarkata mynta u snem nga khlem bteng ïa ka B.Sc namar ngan pynlut ïa ka por ban shah hikai ban thoh ïa ka eksam NEET” ka la ong.
Ka la ïathuh ba ha ka eksam SSLC ruh ka wan ha ka kyrdan 14 ha ka Top-20 na Laitumkhrah Bengalee SS.
Haba ïakren bad u Kñi jong ka Balarisuk Myria, Bah Yoowanmi Myria, u la ïathuh ba hadien ba ka MBoSE ka la pynbna ïa ka result Science stream kim da sngewhun namar ka Balarisuk ka don jingkyrmen ban ïoh Top-10. Kumta ki la pan nyngkong ïa ka ‘xerox copy’ bad hapoh 20 sngi ki la phah peit bniah biang ïa ki lai tylli ki subject.
U la ïathuh ba hadien ba la phah peit bniah biang ïa ki lai tylli ki subject, ka Biology ka ïoh 5 mark, ka Physics bad Chemistry ka ïoh mar 1 mark.
Kumta u la kyntu ïa ki samla pule lada kim sngewhun ïa ki mark ki dei ban phah peit bniah biang sa shisien hapoh 20 sngi ba ïoh ïa ka resol.
U la ong ba kane ka jingïoh biang ïa ki mark hadien ba la phah peit bniah kam dei ka jingbakla ki nonghikai hynrei namar ki la peit bun ngut ki nonghikai ka don beit hangne-hangtai ka jingbakla.
