Shillong, Naitung 02
Ha kawei ka jingjia ha South Garo Hills, ki pulit ki la lap ïa ka metïap jong kawei ka kynthei kaba la don dak shah ot na ryndang hadien ba la suba ba ka la shah leh be-ijot shwa.
Katkum ka khubor ba la ïohlum na ki pulit mynta ka sngi, la ïathuh ba ha ka Sngi U Blei ha ka por kumba 3:30 nohphai sngi, ki pulit ka Nangalbibra ki la ïoh khubor halor ka jingdon jong kawei ka metïap ha ka shnong Jadigittim.
Namarkata ki pulit ka Nangalbibra bad Jadi ki la leit sha katei ka jaka ban leh ïa ka jingtohkit. Ha ka jingtohkit la shem ba katei ka kynthei ka dei kaba la don kumba 36 snem ka rta bad ka shnong trai jong ka, ka dei na Kamrup district ha Assam. Haba la peit bniah ïa ka met, ki pulit ki la shem ba ka la don ka dak shah ot na ryndang bad ïa ka met jong ka la lap na ka jaka kaba jngai tang kumba 20 metre na ka ïing ba ka sah.
Shuh shuh ki pulit ki la ong ba katei ka kynthei ka dei kaba shong bad sah wai marwei ha kawei ka ïing. Ki pulit ki suba jur ba kane ka kynthei ka la shah leh be-ijot ha shwa ba kan shah pynïap. Namarkata ki pulit ki la pynrung da ka jingujor hapoh ki kyndon 302 bad 376 jong ka Indian Penal Code (IPC).
