Ka Dorbar Parliament ka la poi noh sha kaba kut ha ka miet jong ka 2 tarik Naitung, bad lyngba kane ka Dorbar, ki paidbah nongshong shnong ki la ïoh mynsiem haba ki la ïohi ïa ka liang pyrshah ka bakhlaiñ bad kaba nud ban ïa aireng bad ka liang synshar. Ha kine ki 10 snem, ngi sniewbok ba ka liang pyrshah ka la tlot shaba palat haduh ba khlem lah ban ïoh wat tang u Nongïalam ka Liang Pyrshah ha Lok Sabha lane uta u ‘Leader of Opposition’, bad namarkata, ka la pynsuk ïa ka liang synshar ba la ïalam da ka BJP ba kan wanrah ïa ki aiñ rew bapher-bapher. Hynrei 10 snem hadien, ngi ïohi ba ka liang pyrshah ka la sdang ban khlaiñ biang kaba long ka jingai mynsiem ïa ki nongshong shnong namar ngi donkam ba ka liang synshar kan shah takraiñ ha ka rukom kaba dei, bad ban khanglad ïa ka ba kan synshar katba ka mon.
Ki paidbah nongshong shnong ki la ïohi ïa ka jingkren u Nongïalam ka Liang Pyrshah, u Rahul Gandhi, ha kaba u la takraiñ tyngeh ïa ka sorkar ba la ïalam da ka BJP bad ïa ki kam jong ka ha kine ki 10 snem. Baroh shi katto, u Rahul u la shah beiñ shah khoh ha kiba bun wat ha kito ki bym da ïadon bynta than ha ki kam saiñpyrthei. Hynrei ha kine ki khyndiat snem, u la lah ban pynpaw ïalade kum uta u nongïalam ka liang pyrshah uba don ka mon ban ïakhun pyrshah ïa ka sorkar khamtam ïa ki kam leh donbor jong ka. Donbok ba ha kane ka kynti, ki nongshong shnong ki la kham stad ban jied ïa ki MP bad ki la pynthikna ba ka sorkar ka dei ban skhem bad ka liang pyrshah ka dei ban long ka bakhlaiñ. Lada ka pyrla ka noh shiliang sha ka liang synshar, ngin mad jingeh kiba kham khraw haba ïanujor bad ki snem kiba la leit noh. Ngim ong ba ka liang pyrshah kan shu pyrshah kat ïa kaba don ne kat kaba ka sorkar ka leh, hynrei ka dei ban long ka liang pyrshah kaba don ïa ka jingkitkhlieh bad ka ban pynthikna ba ka jingsynshar kan long kaba ïaid beit, kaba lait na ka bamsap bamngem bad kaba ym don kano-kano ka jingleh donbor ïa ki nongshong shnong.
Ngim dei ka Ri kaba lah ban ailad ïa ka jingsynshar donbor lane ka jingbuh ïa uwei u nongsynshar u ban synshar katba u sngewbit. Ngi dei ka Ri synshar paidbah ha kaba wat hadien ba la dep ka ilekshon, ngi dang lah ban pynpaw ïa la ka jong ka sur la ngi kyrshan ne pyrshah ïa ki kam jong ka sorkar. Lada ngi shu sngap jar lane leh bym patiaw, ka sorkar kan ïoh mynsiem ba ka synshar katba ka sngewbit. Ynda la poi ka um ha ryndang pat, ngin sa lynñiar kumba lynñiar ha ri khlaw, bad ha kata ka por, yn ym don ki ban ïohsngew ïa ka sur ka jong ngi. Ha kane ka kynti pat, da ka jingdon ka liang pyrshah ka bakhlaiñ bad kaba donbor, ngi sngewheh mynsiem bad sngewshngaiñ. Ka sur jong ki paidbah kan paw ha ka Dorbar Parliament, ym tang jong kiba kyrshan sorkar, hynrei wat kiba pyrshah ruh. Lada sngap tang ïa kiba kyrshan, ngin leh kumno pat ïa ka sur jong kiba pyrshah? Mano ban sngap ïa ki pat wat lada ka sorkar ka sngewthuh ba ka leh ïa kaba bakla?
Ka liang synshar lane ka sorkar kam dei ban shim ba ka sur na ka liang pyrshah ka dei tang ka sur kaba shu kwah ban pyrshah lut nadong shadong. Ka dei ban sngap ïa ki jingeh jong ki paidbah ha ki liang bapher-bapher. Kam dei ban don kata ka jingsngew ba kiba pyrshah ki dei kiba ïaleh pyrshah ïa ka Ri. Kam long kumta. Ha ka jingsynshar paidbah, ngin hap ban don ka jingkyrshan bad jingpyrshah halor ki nongrim kiba biang. Tang namar ba la shah jied ban don ha ka sorkar, kam mut ba ïa ka sur jong kiba pyrshah dei ban ïuhroit lane leh kumba ki dei ki nongshong shnong. Kata ka long kaba bakla shibun. Ngi hap ban ïa pyni ïa ki jingduna, jingbakla bad ki jingleh palat pud na ka por sha ka por, bad ka sorkar ka dei ban shim ïa ki sienjam ban pynbeit ïa kita khlem da buh khoh ne buh shun ïano-ïano.
Hynrei ka liang pyrshah kam dei ban kut tang ha Dorbar Parliament. Ka dei ban trei kham palat shabar jong ka Parliament da kaba leit sngap ïa ka sur jong ki paidbah kiba mad ïa ki jingeh kiba bun. Lada shu lapmiet tang ban ïa tangon ha Parliament, ka mut ki paidbah kin hap ban shu ap sah tang ynda shong Dorbar ban pynsngew ïa ka sur jong ki lyngba ki MP kiba don ha ka liang pyrshah. Ka kam ka dei ban ïaid man la ka sngi. Ki paidbah ruh ki dei ban shlan ban wan shakhmat ban pynpaw ïa ki jingeh kiba mad namar lada sngap, ka sorkar kan kheiñ ba kam don eiei ban pynbeit ne pynbha. Nangne shakhmat, ngi khmih lynti ba ki paidbah ruh kin ïashim bynta da ka jingshitrhem halor ki nongrim ban pynthikna ba ka synshar ka khadar kan long kaba ïaid beit ïaid ryntih bad katkum ka Riti Synshar jong ka Ri.
