Shillong, Naitung 02
Ka Umïew Maw U Sam bad ka Nongthymmai Raitnongkynrih SC ki la ïoh jingjop ha ka lympung ïalehkai SSA Under-20 4th Division 2024 ha ka sngi Ba-ar ha SSA Stadium kaba ha First Ground, Polo.
Ha ka jingïakhun kaba nyngkong jong ka Group-B, ka Umïew Maw U Sam ka la pynliem noh ïa ka New Challenger SC lyngba ka shi kol ba la thep da u Emmanuel Rongrin ha ka minit kaba 70.
Haba phai sha kawei pat ka jingïakhun ba ar ha ka Group-C, ka Nongthymmai Raitnongkynrih SC ka la pynliem noh ïa ka Mawlynrei SC da 2-1 kol.
Tang mar ïasdang ka jingïalehkai ka Mawlynrei ka la ïoh ban pynkhih jar nyngkong eh lyngba u Winestjune Dohling ha ka minit kaba 3. Hynrei hadien katto katne por ka Nongthymmai Raitnongkynrih ka la lah ban pynphai kylla lyngba u Nicolson Wankhar ha ka minit kaba 10. Hadien saw minit kane ka kynhun ka la pynbud biang ïa ka kol kaba ar lyngba u Ïaikyrmenskhem Shynret na ka bynta ban khur syndon ïa ka jingjop.
Haba phai sha kawei pat ka jingïakhun jong ka Group-B kaba la long ha madan MFA hapdeng ka Mawnianglah Youth SC bad ka Mawpdang SC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Kane ka lympung kan bteng biang ha ka sngi Balang ha kaba ka Laitkroh SC kan ïakhun pyrshah ïa ka Pynthorbah SC ha ka por 1:45 janmiet ha SSA Stadium, kumjuh ka Laitlulong SC ïa ka Mawklot SC ha ka por 4 baje. Katba ka Laitumkhrah SC ïa ka Lumkseh SC ha ka por 4 baje ha madan MFA, Polo.
