Shillong, Naitung 02
U Bah Bindo M. Lanong u la ong ba ka jingkren u General Secretary ka United Democratic Party (UDP), Dr. Jemino Mawthoh halor ki kam nongïalam ka seng (UDP) ka long kumba kren u nongai dud uba kam ba ka dud jong u ka long kaba bha wat la ka bun sa tang ka um.
“Ïa ka jingkren jong u Jemino – u long kum uto u nongai dud uba lada ka um ka bun katno-katno ruh, u ong hi ba ka dud kaba bha,” la ong u Bah Lanong haba kynthoh ïa ka jingkren u Dr. Mawthoh halor ki kam nongïalam ka seng.
U la ong, “Da ka bun um ka dud katno-katno, u nongai dud u ong beit ba ka dud jong u kaba bha.”
U Bah Lanong u la ong ruh ba u Dr. Mawthoh u kren ha katei ka rukom haba ïadei bad ki kam nongïalam ka UDP.
“U dei ban pynshisha keiñ, ban pynshong nongrim namar lada ka UDP ha ki por kiba la dep kaba ju wan banyngkong, ba-ar, mynta ka poi syndon ba-saw ha kane ka ilekshon MP ba la dep bad u kyrtong jong ka u ïoh tang sawphew hajar tam bad u la don lang bad ki kyrtong shimet sha trai, hangno shuh kata ka jingkam jong u Jemino ba ka kam nongïalam ka UDP ka long kaba biang kaba bit,” u la buh jingkylli.
Kum ban shu kdew hangne, u Dr. Mawthoh ha kine ki khyndiat sngi ba la dep u la kyntait ïa ki jingkynnoh ba ka jingtlot ka jinglong ki nongïalam jong ka kynhun nongïalam ba mynta ka la ïalam sha ka jingtroiñ jong ka seng.
