Shillong, Naitung 02
Ka Education Cell jong ka Khasi Students’ Union (KSU), ha ka Sngi Ba-ar ka la ïoh ban phah shithi sha ka Myntri ka tnad ka koit ka khiah ka Jylla, Dr. M. Ampareen Lyngdoh halor ki mat ba ïadei bad ka bhah MBBS kaba ju mang da ka Sorkar Jylla na ka bynta ki samla pule man la u snem.
Ka jingthmu ka seng lyngba ka shithi sha ka Myntri ka long ban pan jingshai na ka tnad ka koit ka khiah halor ka jingdon ki jaka ne ‘seat’ na bynta ki samla pule doktor kiba ju phah da ka Sorkar Jylla sha ki jaka pule bapher-bapher ha kylleng ka ri India.
“Na ki daw ba ju sakhi ha ki snem ba la dep, ka seng ka kyntu ïa ka tnad ka koit ka khiah ba lada jia ba ki samla kiba dei ki Khasi ne Garo, ki ïoh ban rung lane ki kynjoh ban poi sha ka ‘Open Category’, kum ïa kita dei ban pynrung beit sha ka ‘Open Category’, khnang ba kiwei pat ki samla na ki thup ba la bhah kin ïoh bynta lang ban rung ha ki thup ba la bhah kyrpang ïa ki,” la ong u Education Secretary ka KSU, samla Pynkmenlang Sanmiet ha ka kyrwoh khubor.
U la ong ba ka seng ka la ai jingmut ruh ïa ka tnad ka koit ka khiah, ba lada don ki samla, hadien ba ki la ‘pass’ ïa ka eksamin NEET, bad lada ki poi sha ka kyrdan ban ïoh rung sha ka ‘All India Quota’, kum ïa kita ruh dei ban ai lad, khnang ba kin don shuh-shuh ki samla na ka Jylla ki ban ïoh lad ban leit pyntbit ha ka kam doktor.
Ha kajuh ka por, ka seng ka ban jur ïa ka Sorkar ba ka jingpynbeit ïa ka bhah leit pule doktor ka dei ban long kaba shai, khuid, suba, ka bym don jingleh shiliang ne shah liang bad ym dei ban buhrieh ïa ki jingshisha, hynrei dei ban long haba shit haba shai bad kaba pynhun lang ïa baroh.
Ha kawei ka liang, ka seng ka wer bad kyrpad ïa ki shnong ki thaw, ki Hima ha kylleng ka Bri u Hynñiewtrep ban ym ai syrnot pynshisha ne ‘Residential Certificate’ ïa ki bym dei ki paradoh parasnam, namar kane ka ktah ïa ka bhah leit pule ba la mang kyrpang ïa ki samla trai-ri jong ka Bri Hynñiewtrep.
Ka seng ka la pynkynmaw ruh ïa ka jingjia ha u snem ba la dep, ha kaba ka hap ban ïeng pyrshah bad dawa pynduh bad weng syndon ïa uwei u bar jylla uba kam ba u dei u trai-ri.
“Na bynta ka bha ka miat bad ka jingmyntoi ki samla ka ri, ka seng lyngba kane ka kyrwoh ka kyrmen skhem ba ka jingpynbeit ban phah leit pule doktor ïa ki samla ka ri, kan long kaba ïaid beit ïaid ryntih ha baroh ki liang bad kan ym don ka jingbuhrieh la ka long ha kano-kano ka liang,” la ong utei u nongïalam.
Shuh shuh ka seng ka kyntu ïa ka Sorkar ban ym pdiang kulmar ïa ki kot ki sla jong ki bar jylla kiba mlien ban ïalam bakla bad kam ba ki dei ki nongshong shnong ka Jylla tang ban ïoh bynta ha ka bhah pule doktor kaba dei hok tang ïa ki samla pule trai-ri.
