D. Pakyntein
Ngim ju klet ïa u (L) Captain Keishing Cliffort Nongrum, bad ngi sngew ba dang mynno, hynrei 25 tylli ki snem ki la leit. Wat lada um don shuh, hynrei u im kumba im u Tirot Sing, Kiang Nangbah, Pa Togan Sangma, bad kiwei, ha ka dohnud ka jong ngi; hooid, ngim klet ruh ïa baroh ki shipai ka Ri India, kiba la pha ïa la kajong ka jingim. Ngim tip lano kane ka jingïakynad hapdeng ka India bad Pakistan kan kut. Ki lehnoh kim map shuh wat ïa ki khyllung khynnah ka Ri India. Kine ki lehnoh, kim don mynsiem shuh wat ïa ki nong Pakistan ruh; ka jingkren ka Muniba Mazari, ka long kaba sngewsynei bha, ba ki lehnoh ki synreit kuli naphang, ïa ki khynnah skul ha Peshawar, ki khyrwit ïa ki ïingmane, kim mab shuh ïa ki ïing lehniam ki Muslim ruh. Kane ka ‘riew kynthei bashlur, ka ïeng pyrshah ïa ki lehnoh, ka ïeng na ka bynta ki kynthei khynnah, bad ka ïoh ïa ka nam:”The Iron Lady of Pakistan.” Hooid, ka India ka khlaiñ da ki spah shah ban ïa ka Pakistan, hynrei, hap pyrkhat ïa ki mynsiem ba lui-lui, namar ym baroh kiba sniew “people are not evil, but in-dividuals are evil”
Ka lah dei ka por ba ka India kan sangeh noh ka khaiï-pateng, bad ym dei shuh ban ïalehkai kriket bad ka Pakistan, khnang ban hiar shuh ka ïoh ka kot jong ka, namar ka kriket hapdeng ka India bad Pakistan ka dei kaba rem dor bha. ïa thab kti, ïa leh kmen, katba ki nong India ki ïam pait dohnud. Kaei ka khubor ba ki lehnoh ki phah? ban khyrwit ïa ka bus ba kit ïa ki riew niam,bad hap sha riat ha Jammu’s Reasi, shi kynta shuwa ban bam smai u Narendra Modi.
Haba ngi peit ïa ki pud sawdong jong ki jylla, shatei lam mihngi, la tawiar da ka China, Myannar, Bangladesh bad Bhuttan. Hooid, la pynkhlaiñ bha ha Arunachal Pradesh, hynrei ym lah ban tip, na ei u China un pyrshang ban rung. Ngim tip katno kitai ki 3 tylli ki ri, ki paralok jong ngi, ki khlain. Ka jingïateh lok ka China bad ka Maldives, ka dei tang ka buit, ban ïoh pynper ïa ki jhad ïapom, ka jingmut sniew ban tawiar ïa ka Ri India. Ka jingïakren hapdeng ka Smita Prakash bad u Lopsang Sangay ha ka channel ANI, kumno u ïathuh shaphang u Dalai Lama, ka dei kaba sngewtynnat bha, bad kaba ïadei bha ha kane ka phang.
Ka don kawei ka buit bastad ka Sorkar India, ïa kaba ka lah pyntrei kam ïa ka Vibrant Villages Programme (VVP) ban kynkiew ïa ki shnong khappud, kiba kynthup haduh 2967 tylli ki shnong, ha ki 46 tylli ki kyntoit khappud, jong ki 19 tylli ki distrik ha 4 tylli ki jylla bad kawei ka Union Territory. Na ka 2967 tylli, ka sorkar ka mang kham kyrpang ïa 662 tylli ki shnong, kata 455 ha Arunachal Pradesh, 75 ha Himachal Pradesh, 35 ha Ladakh, 46 ha Sikkim bad 51 ha Uttarakhand. Kane ka prokram ka thmu, ban kynkiew ïa ka ioh ka kot, ban shna surok, ban tei ki ïing ki sem ba long ban shong ban sah, ban tei jingtei na ka bynta ka shnong, ban ring bording na ka sngi bad la lyer, ban pynjanai ïa ki lad pathai khubor, ban seng ïa ka tnad ai jingtip hapoh shnong, ban kyntiew ïa ka kam jngoh kai pyrthei bad ka kolshor, ban kyntiew ïa ki kam lajong, ban seng ïa ki co-operative societies ki ban peit ba ka rukom im kaba i donburom, kynthup ïa ka rep ka riang, ban thung kynbat ban shna dawai, bad kiwei kiwei de. Lah donkam ka jingïatylli jong baroh ki jylla ba khlem ioh ïa ka bhah, ban kyrpad ïa ka Sorkar Kmie, ban ioh bhah lem, lyngba kane ka prokram. Haba lah biang lut, ym don shuh ba phet shnong, bad ki long ki nongsyntiat ban ïada ïa ka Ri. Lah iohi ruh kumno, ki nongap langbrot, ka Ladakh ki ïa pyneh bad ki shipai China.
