Resubelpara, Naitung 02
Ki pulit jong ka North Garo Hills (NGH) hynnin ka sngi ki la kem sa ïa uwei u dkhot (ba-lai) jong ka kynhun ki runar nonglute kaba ju treikam ha ki jaka khappud ka Assam bad Meghalaya.
Ka jingshah kem kaba lai, ka long hadien ka jingujor sha ki pulit na ki lanot (kiba la ngat ha ka apot shah lute ha ka 19 tarik Jylliew) ha thanat Mendipathar hadien ba ki la shah tuh pisa lem bad ki jingdon-jingem na ka jingshah pynap pistol ha ka kynhun ki runar nonglute ha ka 18 tarik Jylliew.
Katkum ki jingtip ba la ïoh lum, ha ka janmiet 18 tarik u Jylliew, saw ngut ki runar, kiba shong da ki ar-shaka (Aprilia Scooty AS18J-0181 bad Bajaj Pulsar 220 AS18 E-7925) ki la pynsangeh ïa ki lanot da kaba pynap pistol bad dawa pisa na ki. Ki la rong noh ?80,000/-, ki kot ki sla donkam ha ryngkat 2 tylli ki ‘mobile phone’ bad ki ‘SIM Card’.
Ha kajuh ka janmiet, katei ka kynhun ka la shah khang lad ha ki nongshong shnong ka Beldongpara hapoh Krishnai, Goalpara – Assam kiba la phet noh na ka jaka jong ka jingjia, hajan Manikganj, NGH.
Kitei saw ngut ki runar ki la ïoh ban phet krad da kaba ieh noh shadien ïa ka thuk-thuk ‘Pulsar’. Hadien kane, la aiti noh ïa ka sha thanat Mendipathar.
Ha ka 19 tarik Jylliew, 2024 la ïoh pdiang ïa ka ejahar na ki lanot bad la pynngat mukotduma ha thanat Mendipathar – Case No. 09(06)2024 U/s-392 IPC, R/w. Sec. 25(IA)(IB) Arms Act.
Haba ïadei bad kane, la pynlong ïa ka jingthwet hapoh ka jingïalam u DySP, Special Ops bad ka kynhun jong u ha ka jaka ba la suba rieh tngen marjan bad ka Assam.
Uwei na ki runar, Sunil Boro (33 snem ka rta na Upper Borgum, PO/PS Dudhnoi) u la shah kem noh na kawei ka jaka kaba hap hapoh thanat Dhupdhara ha ryngkat ka ‘Scooty’ kaba don ïa u nombor ASI8J-0181 kaba la pyndonkam ha katei ka kam. Kiwei pat kiba la pynithuh hadien, ki kynthup ïa u Kaltu Rabha, Turti Basumatary bad Sahadev Basumatary, baroh na ka thaiñ Dudhnoi, Assam hynrei ki la ïoh lad ban phet krad.
“Namar ka jingthwet kaba jur na ka liang ka kynhun, ha ka 1 tarik Naitung, uwei na kiba shah kynnoh donkti, Turti Basumatary (na Buglamari, PO Lela, PS Dudhnoi, Goalpara, Assam) u la wan pyndem noh hakhmat ki pulit ka NGH ha ryngkat bad kawei ka ‘semi-automatic pistol’ bad 2 tylli ki kuli.
“Ha ka jingphla jong u, la kem sa ïa u Sahadev Basumatary na khappud Assam-Meghalaya najan Tikrikilla, West Garo Hills,” la ong u SP, NGH, Swapnil V. Pawar.
U SP u la ïathuh ba ka jingthwet ka dang ïaid ban kem ïa kiwei pat kiba sha kynnoh donkti da kaba buh jingmut ba kine kiba suba donkti ki dei kiba ju don bynta ha ki kam be-aiñ ba kynthup ïa kiba bun ki kam lute ha Assam and Meghalaya.
