Shillong, Naitung 02
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon u la kyrpad ïa u Myntri ka tnad Road Transport & Highways ka Sorkar Pdeng, u Nitin Jairam Gadkari ban tuklar lem haba ïadei bad ka jinglong-jingman ka surokbah NH-6 hapoh ka Jylla.
“Nga kwah ban pynsngew ha phi haba ïadei bad ka jinglong-jingman ka National Highway 6 (NH-6) kaba long ka surokbah kaba kongsan kaba ïaid lyngba ki Jylla Meghalaya, Assam, Tripura bad Mizoram,” la ong u Dr. Syngkon ha ka shithi ba la phah sha u Myntri. U MP u la kdew ruh ba ka surokbah NH-6 ka dei ka lad pynïasoh sha ki katto-katne ki sor bah bad jaka sor ba donkam jong kitei 4 tylli ki Jylla ba kynthup ïa ka Jorabat, Shillong, Jowai, Silchar, Aizawl, Agartala bad ka kut hajan khappud ka India bad Myanmar.
“Ka bynta jong ka surok kaba hapoh East Jaiñtia Hills jong ka Meghalaya ka don hapdeng ka jingjot rathai, khamtam ka bynta na Jowai sha Ratacherra ha kaba ki nongleit-nongwan bad ki nongpyndonkam kin hap mad ïa ka syrtok namar ka jinglong-jingman jong ka surok,” la ong u Dr. Syngkon.
U la ong ruh ba ka jinglong-jingman jong ka surok ka la nang kham palat shuh-shuh ha ka por slap ha kaba ki briew ki hap ban sahkut da ki sngi ban poi sha ki jaka ba ki thmu.
Haba pynsngew ba kane ka mat ka la ïaid mynta la katto-katne snem, u MP u la ong ba kane ka la buh jingeh shi kat dei bad wanrah ka jingduhnong ha ka ïoh ka kot bad wat ka jingduh noh ïa ki mynsiem kordor jong ki nongshong shnong na saw tylli ki Jylla – Meghalaya, Assam, Mizoram bad Tripura.
“Haba ïadei bad kane, nga kyrpad ïa ka shlem treikam jong phi ban sngewbha tuklar lem bad ban shim ïa ki sienjam ba mardor bad ba donkam halor kane ka mat khnang ban pynduna ïa ka jingeh jong ki nongshong shnong jong kine saw tylli ki Jylla,” u la ong.
Shuh shuh u la bynrap, “Ngan da sngewburom eh lada ngi lah ban ïakren halor kane ka mat markhmat na bynta ka saiñdur ka ban neh haba ïadei bad kane ka surok.”
