Nongpoh, Naitung 02
U Bah Mayralborn Syiem, MLA jong ka Nongpoh konstitwensi u la leit ban kitbok kitrwiang ïa ka kynhun ïalehkai phutbol U-17 ki samla kynthei jong ka Christian Higher Secondary School (CHSS), Pahamsyiem, ki ban mihkhmat ïa ka Ri Bhoi District sha ka State Level Subroto Cup 2024 ka ban sa long shen ha ka nongbah Shillong.
Ïa kane jingïalang la pynlong ha ka Lah Sngi U Blei ha madan NCSA Pahamsyiem kaba la pynlong shwa da ka jingduwai ha ka jingïadon ryngkat lang ruh da ki nongïalam shnong bad nongïalam skul bad ki ‘thei ïalehkai jong ka skul.
Na ka liang u Bah Mayralborn haba kren ha katei ka sngi, u la pynpaw ïa ka jingsngewkmen ba ki ‘thei ïalehkai jong ka skul CHSS ki la ïoh ïa kane ka lad ban mihkhmat ïa ka district sha katei ka lympung ka ban sa long shen ha ka nongbah Shillong bad ban ïakhun pyrshah ïa kiwei ki skul jong ki district bapher bapher. U la ong ba ka jingwan ka jong u ka long kum shi bynta ban ai mynsiem ïa ‘thei ïalehkai bad ai ruh ïa ka kitbok kitrwiang ba kin ïoh ban pyndonkam bha ïa ka sap ka phong kaba ki don.
Utei u nongmihkhmat u la ai mynsiem ruh ïa ki ‘thei ïalehkai lyngba ki kyntien jong u Swami Vivekandanda da kaba ong ‘Khie joit, kyndit na jaka kaba phi don, bad ïakhun haduh ba phin poi sha ka thong jong ka jingjop” bad kyntu ruh ba kumba ki la ïoh ban mihkhmat ym tang ïa ka skul, hynrei ïa ka district hi baroh, ki dei ban long kiba lehrit, kiba don akor bad minot bad ban trei shitom, naba kan sa long ka jingmyntoi ïa ki hi shimet bad kan rah ruh ïa ka nam ka burom ïa ki paidbah ka thaiñ.
Ha katei ka sngi, u Bah Syiem, u la aiti ruh ïa ka song pisa, ki jaiñphong ïalehkai (jersey) kum shi bynta ban kyrshan bad tynrong lang ïa ka jinglut jingsep jong ka skul na ka bynta kitei ki ‘thei ïalehkai U-17 ki ban mihkhmat ïa ka district.
