Hathras, Naitung 02 (UNI)
Ka jingdon kiba la khlad na ka jingïaïuh para briew ha Hathras, Uttar Pradesh ka la kiew sha ka 116 ngut haduh ka miet jong ka Sngi Ba-Ar, bad na kine, 106 ngut ki dei ki kynthei bad 7 ngut ki khynnah.
Nalor kiba la khlad, ki don ruh sa kumba 18 ngut kiba la mynsaw bad la pynkit ïa ki sha ki jaka ai jingsumar.
Katei ka jingïaïuh para briew ka la jia ha ka jaka ba la pynlong jingduwai lane ka Satsang jong ki riewngeit Hindu. Ïa kane la pynlong ha ka jaka kaba don ha ka thaiñ Sikandra Rao ha Hathras district.
Katkum ki khubor ba la pynmih da ki lad pathai khubor na Ri thor, la ong ba ïa katei ka jingduwai la pynlong kum ka jingai burom ïa uwei u ‘guru’ ïa uba la ju tip kum u Bhole Baba lane u Narayan Saakar Hari. La ong ba ka jingïaïuh ka la long ha ka por ba ki paidbah ki la sdang ban mih na katei ka jaka.
Na ka liang ki bor sorkar ki la rai ban ai da ka jingujor lane FIR pyrshah ïa kito kiba la pynlong ïa katei ka jingïakynduh. Ka sorkar ka la thung ruh da ka kynhun kaba kynthup ïa ka Additional DGP Agra bad ka Divisional Commissioner Aligarh ban tohkit halor ki daw kiba la wanrah ïa katei ka jingïa ïuh para briew kaba la ïalam shaduh ka jingkhlad noh jong palat spah ngut ki briew.
Na ka liang ka Development Commissioner, Aligarh, ka Chaitra V, ka la ong, “Katkum ka jingïoh jingtip haduh mynta, kiba la ïap ki don 116 ngut katba 18 ngut ki la mynsaw. Ïa kiba la mynsaw la phah sha Aligarh ban ïoh jingsumar.”
Ka la ong ba ïa ka jingpynlong ïa katei ka jingïakynduh ban ïa duwai la ai jingbit da u Sub-Divisional Magistrate (SDM) bad ki pulit. Ka ADGP Agra, ka Anupam Kulshretha, ka la ong ba katei ka la jia ha ka thaiñ Phulgarhi jong ka Hathras distrik bad ki la don bun ngut ki kyntiew kiba la leit ban ïashim bynta. Ka la ong ba yn dang hap ban tohkit kaei ka daw kaba la wanrah ïa katei ka jingïaïuh para briew.
Kham hashwa, u District Magistrate ka Hathras, u Ashish Kumar Patel, u la ong ba katei ka jingïaïuh para briew ka la jia namar ka jingjur palat ka jinglhop ha ka por ba ki paidbah ki la sdang ban mih noh hashwa ban kut ka jingïalang.
Na ka liang u Myntri Rangbah ka Uttar Pradesh, u Yogi Adityanath, u la pynbna ba ka sorkar jylla kan ai jingïarap T. 2 lak sha ki bahaïing hasem jong kito kiba la khlad bad T. 50,000 kum ka bai sumar ïa kito kiba la mynsaw.
