Shillong, Naitung 02
Ka All Khasi Hills Achik Federation (AKAF) ka la phah ki jingai jingmut sha ka Expert Committee ha kaba ïadei bad ka bhah thungkam jong ka Jylla (state job reservation policy) da kaba pynneh beit ïa ka bhah 40 na ka 100 (40%) ïa ki Garo tangba ha kajuh ka por ka ai jingmut ban pynkiew sa 8% ïa ki Khasi da kaba shim na ka bhah kaba 20% kaba ju mang ïa kiwei pat riewlum kiba don ha kane ka Jylla.
Ka AKAF ka la pyni ïa ki jingai jingmut lyngba ka jingthoh kaba la phah sha ka Expert Committee ha ka Sngi Ba-ar kaba la soi da u President u Clivestar Ch Marak bad Secretary u Manuel Ch Marak.
“Ka seng ka ai jingmut ba lada ka Expert Committee ka pynleit jingmut ha ka jingkhmih biang ne jingpynkylla ïa ka Reservation Policy, ha ka jingsngew jong ngi, ngi kyrpad rit ban pynkylla ïa ka 20% jong ka Job Reservation Policy kaba mang ïa kiwei pat ki riewlum bad ka General category da kaba pynkiew sa 8% ïa ki paid Khasi bad Jaiñtia bad ban bhah noh tang 12% ïa ki General Category bad kiwei kiba dei ki riewlum” la ong ka AKAF ha ka jingthoh.
Ha ka jingai jingmut, ka AKAF ka la kren shai ïa ka jingdonkam ban pynneh ïa ka bhah na bynta ki Garo kata, 40 na ka 100 kam dei ban shah ktah.
Ka AKAF ka la kyrpad ïa ka Expert Committee ban pynneh kumjuh khlem da ktah ïa ka Job Reservation ki Garo, na ka bynta ka bha ka miat jong ki lai tylli ki jaitbynriew trai muluk ka Jylla – Garo, Khasi bad Jaiñtia bad na ka bynta ka bha ka miat jong kiwei ki paid riewlum bad ki nongshong shnong ka Meghalaya.
Kumta kane ka seng ka la ai jingmut ba lada donkam ban pynkylla ïa ka Reservation Policy jong ka 12 tarik Kyllalyngkot, 1972, dei ban pynkylla tang ïa ka 20% kaba dei ka bhah basah jong ka Job Reservation Policy.
Shuh shuh ka AKAF ka la ong ba haba ka kyrpad ban pynkiew da 8% kata ban poi haduh 48% ka bhah ïa ki Khasi bad Jaiñtia, ka kyrpad ruh ban kynthup lang ïa ki paid Garo kiba sah ha kylleng ki bynta jong ka Rilum Khasi bad Jaiñtia kiba la shong shnong pura ha Rilum Khasi bad Jaiñtia.
Ka AKAF ka la ong ba ka daw bad nongrim ba ka dawa ban kynthup lang ïa ki paid Garo kiba sah ha Khasi Hills ka dei namar ka jingïaphiah pud, ki paid Garo kiba sah ha Khasi Hills wat la ki paid Garo ki la ïoh 40% ka bhah, hynrei kane ka dei kaba la mang ïa ki Garo ba sah ha kylleng ki bynta ka Rilum Garo ym ïa ki Garo kiba sah ha Rilum Khasi.
“Ki Garo kiba sah ha Rilum Khasi ki dang sahdien bha ha kiba bun ki liang bad ki Garo kiba sah ha Rilum Garo ki dang shadien bha ha ka liang ka pule ka puthi, ka rukom im bad ha ka ïoh ka kot,” la ong ka AKAF.
