Shillong, Naitung 02
U Cristiano Ronaldo u la pynthikna ba ka Euro-pean Championship ha Germany kan dei kaba khatduh eh na ka bynta jong u ha ka kam ïalehkai.
Kane ka Euro 2024 ka dei ka sien kaba hynriew ïa u Ronaldo ban ïoh ïashim bynta ha ka European Championships.
Ïa kane ka lympung yn pynlong da ka United Kingdom bad ka Republic of Ireland ha ki saw snem ki ban wan, ha kaba u Ronaldo un sa kynjoh sha ka 43 snem ka rta. “ym don jingartatien ba kane ka Euro kan dei kaba khatduh eh ïa nga,” la pynpaw u Ronaldo ha kawei ka tyllong khubor.
“Hynrei ngam don kata ka jingsngew ba ngan bynnud namar nga la trei shitom ha ka kam ïalehkai phutbol kaba nga da ieit eh nalor ki nongkyrshan kiba ai mynsiem ba ngan ïalehkai bha.”
U Ronaldo, uba la ïoh ban ïalehkai nyngkong eh ïa ka Portugal ha u snem 2003, ha kaba u la lah ban pynurlong na ka bynta ban rah ïa ka nam lahduh ha ka lympung ïalehkai kaba la long ha 2016 bad u la long u rangthep kol ba kynsai da kaba thep haduh 130 kol.
“Kaba kham kongsan eh ha ka jingïaid lynti ka jong nga ka dei ka jingthrang bad ka jingangnud haba nga ïalehkai ha kane ka lympung,” u la bynrap.
“Haduh 20 snem ba nga la ïoh ban mihkhmat bad ban ïalehkai na ka bynta ka ri, ha kaba ka la long ka jingkmen ïa ki paidbah, bahaiing bahasem jong nga, ki khun jong nga bad dei kane kaba la ai mynsiem ïa nga.”
Kawei kaba pynkulmar jingmut ïa u Ronaldo ka dei ha ka Lah Sngi U Blei ha kaba u la pynlehnohei ïa ka penalty kaba u la ïoh ha ka minit kaba 114 ha kaba u rangapkol ka Slovenia u Jan Oblak u la lah ban khanglad na ka bynta ban pyllait na ka jingshah thep.
Kane ka kynhun jong ka Portugal ka la ïoh jingjop ha pre-quarter final hadien ka la lah ban pynliem noh ïa ka Slovenia lyngba ka tie-breaker da 3-0 kol hadien ba u rangapkol ka Portugal u Diogo Costa u la lah ban khanglad haduh lai sien kynthih ba la shut da ki rangïalehkai ka Slovenia.
Wat la kitei ki kynhun ki la ïakhun tyngeh naduh kaba sdang, hynrei kim shym la lah ban thep kol haduh kaba kut jong 90 minit. Utei u khlur ïalehkai ka Al Nassr um lah khlem da jaw ummat hadien ba u la pynlehnohei ïa ka penalty kaba u la ïoh ban shut, hynrei ki para nongïalehkai ki la pyntngen ïa u.
“Ha ka phutbol ki ju wan jia kum kine. Hynrei nga ïaleh katba lah ban ïalehkai bha haba nga phong ïa ka sopti ïalehkai na ka bynta ka ri kam pher wat la ngam shym la lah ban pynurlong,” la bynrap u Ronaldo.
“Kumba phi la ïohi, nga la pynlehnohei ïa ka penalty, hynrei nga ju kwah ban long uba nyngkong eh ban thep kol namar nga don ïa ka jingkitkhlieh na ka bynta ka kynhun. Ngam ju don kano kano ka jingsngewtieng haba nga ïakynduh ïa kum kine ki jingeh.”
U Ronaldo, uba la bat ïa ka rekod da kaba thep haduh 14 sien ha kane ka lympung, u la khmih lynti ban pynurlong ba ka bynta ban ïoh thep kol ha Germany.
“Ka long ka jingsngew diaw haba ngim lah ban thep kol, hynrei ha ka phutbol ka ju wan jia,” la bynrap une u khlur ïalehkai uba la khur haduh san sien ïa ka khusnam Ballon d’Or.
“Nga la pynlehnohei haduh ar sien ïa ka penalty mynta u snem ha kaba nyngkong ka long pyrshah ïa ka Al Ain ha ka quarter final jong ka Asian Champions League bad ïa ka Al Hilal ha ka final jong ka King Cup of Champions, hynrei mynta nga la lah ban pynurlong ïa ka jingjop.”
Lyngba katei ka jingjop, ka Portugal kan pynkhreh ban ïakynduh pyrshah ïa ka France ha ka quarter final ka ban long ha ka sngi Thohdieng.
“Kan long ka jingïakhun kaba kham eh bha ban ïakhun pyrshah ïa ka France, kaba don jingkyrmen ban khur ïa ka jingjop ha kane ka lympung ryngkat ka Germany bad ka Spain,” la bynrap u Ronaldo.
“Hynrei ngin hap ban ïaleh thma lyngba ka phutbol. Ka kynhun ka la ïalehkai bha kumba ka la lah ban ïakhun pyrshah ïa ka Slovenia bad ngin dangïai ïakhun tyngeh haduh kaba kut.”
