Shillong, Naitung 02
Ka Synjuk ki Nongñiah Taksi Sor bad Khapsor ha ka 2 tarik u Naitung 2024 ka la leit ban buh da ka jingthoh ha u Executive Member ka KHADC uba dei khmih ïa ka tnad Labour, u Bah Victor Rani ban kyrpad ïa u na ka bynta ban pyrkhing ïa ka jingai Labour License sha ki nongkamai taksi kiba dei ki bar jylla.
Haba kren sha ki lad pathai khubor, na ka liang ka synjuk ka la ong ba ka Council ka la ong ba ka la khang ban ai ïa ka laisen sha ki nongñiah kali kamai kiba dei ki bar jylla kiba ju wan kamai ha sor Shillong. Hynrei haduh mynta ka synjuk ka dang ïai lap ïa ki bar jylla kiba ju kamai kali ha ki thaiñ Laitumkhrah, Rynjah, Nongthymmai bad ha kiwei-kiwei ki jaka.
“Kane ka dei ka bynta ba na ka liang ka District Council ka dei ban shimkhia namar kum ka Council ka ïeng hi na ka bynta ka Ri bad ka Jaitbynriew bad kaba kdup ïa ki khun Khasi-Khara, kumta ka dei ban shimkhia halor kane ka bynta namar kane ka la ktah eh ïa ka ïap-ka im bad ka jakpoh jong ngi ki draibar”, la ong ka Synjuk.
Na ka liang u Bah Victor u la ai ka jingkular ba un sa shimkhia halor kane ka bynta ban talasi ïa ka laisen jong ki bar jylla.
Shuh shuh ka synjuk la ong ba ïa kane ka kam ka la ïai shah la 2 snem kynthih bad kumta lada na ka liang ka Council kam lah ban leh eiei halor kane, ka synjuk kam banse ban leh noh da kiwei ki lad ki lynti.
”Lada ngi leh ma ngi ki draibar, ngi tieng ïoh ba ki kylla sohpdung ki paidbah hynrei lada ka long kumta pat, kine kiba dei peit ïa kane ki dei ban shim ïa ka jingkitkhlieh”, la ong ka synjuk.
