Shillong, Naitung 02
Ka kynhun tohkit ba la thung da ka tnat Housing jong ka Sorkar Jylla ban tohkit halor ki jingkynnoh ba don ka jingbamsap na ka jingsam tin sop ïing, ka la sdang ïa ka jingtohkit ha ka Sngi Ba-ar na ka kudam kaba don ha Langkyrding Lumphira, Nongmensong.
Lah ban kdew ba ka HYC dang shen ka la dep ban ujor sha u Myntri ka tnat ba dei peit bad kumjuh ruh ban ujor sha ka Meghalaya Lokayukta halor ka jingkynnoh ba ka la don ka jingsam da ki tin sop ïing kiba stang da ka tnat Housing sha ki paidbah lyngba ki Community & Rural Development Block (C&RD) ka Jylla kaba la thied lyngba ka Chief Minister Housing Assistance Programme (CMHAP).
Ha kane ka sngi sdang, ka kynhun tohkit ka la hiar ban jurip ïa katei ka kudam kaba la buh ïa ki tin sop ïing, hangne la ïoh ban sakhi ba na ka liang kane ka kynhun ha ryngkat ka jingïadonlang ki nongïalam ka HYC, ki la sei ïa ki katto katne tylli ki tin ban thew ïa ka jingrben bad ha kaba la lap ba kim shym la don satia katkum kaba la buh nalor ba ki long ruh kiba sting bad shem ba kim long satia katkum ki kyndon.
Ha kane ka jingthew ïa ki katto katne tylli ki tin, la lap ba ka lynter bad ka pyngkiang ki long kiba biang hynrei ka jingbym biang ka dei beit thik ha ka jingrben, kata kaba don tang hapdeng ka 4- bad 41 mm ha ka jaka ba kan dei 45 mm.
Lah ban kdew hangne, ïa ki tin sop ïing la shalan da ka kompeni Hariana Iron Works Pvt Ltd, na Kolkata, West Bengal bad la pynpoi ïa kine ki tin sha baroh ki District bad ki Block ka Jylla.
Haba kren sha ki lad pathai khubor hadien ba la dep ban thew bad peit bniah da ka kynhun tohkit, u President ka HYC u Bah Roy Kupar Synrem uba la synran lang, u la ïathuh ba ha ka jingthew ïa kine ki tin ha kane ka kudam la lap ba ka jingrben jong ka tin kam ïahap satia bad kaba dei ban long ne ki kyndon ba la buh da ka tnat Housing (kaba dei 45 mm) hynrei kine ki don tang 40 ne 41 mm.
U la ong ruh ba ha ka jingshisha na ka liang ka kynhun tohkit ka la dei ban rah lang ruh wat ka jingthew jingkhia namar haba rah ïa ki tin, la sngewthuh ba ka jingkhia jong ki tin ruh ka duna bha bad kan nym don satia 50 kilo lada thew lang 9 tylli ki tin kumba ka dei ban don.
“Ngin sa ïa hiar lang bad ka kynhun tohkit sha kiwei pat ki jaka ban ïa peit bad ïa thew ïa kine ki tin. Hadien kane ka kam, ngin sa pynkhreh ïa ki jingai jingmut ban sa phah pat sha ka Sorkar Jylla ïa kaei kaba ka dei ban leh,” la ong u Bah Roykupar.
Kane ka kynhun tohkit kan pynlong ïa ka jingtohkit ha ki C&RD Block ka East Khasi Hills haduh ka 9 tarik Naitung, bad hadien kane kan sa hiar sa sha West Jaiñtia Hills ha ka 12 tarik Naitung, Ri-Bhoi ha ka 13 tarik Naitung, Eastern West Khasi Hills bad West Khasi Hills ha ka 16 tarik Naitung, East Jaiñtia Hills ha ka 19 tarik Naitung bad South West Khasi Hills ha ka 20 tarik Naitung.
