New Jersey, Naitung:
Kawei ka nonghikai jong kawei ka skul ha New Jersey, ka la shah kem noh hadien ka jingshah pharep ba ka donkti ha ka kam shongkha- shongman bad uwei u khynnah skul. Ka Allison Havemann-Niedrach kaba pule ha Freehold Intermediate School ka la shah pynngat ha ka kam thombor kaba shyrkhei ha ka kyrdan kaba nyngkong bad kaba buh jingma ïa ka bha- ka miat jong u khynnah, la ong u Raymond S. Santiago, u nongbishar jong ka Monmouth County.
Katkum ka khubor, la iathuh ba ki pulit ki la leit ban kem noh ïa ka ha kane ka taiew hadien ba ka jingtohkit ka la pynpaw ba ka la sdang ban lehbein ïa utei u khynnah skul jong ka ha ka por sdang skul jong une u snem.
Hynrei ki bor pyniaid kim shym la iathuh kumno katei ka jingleh ka la paw ne katno sien ka la lehbein ia utei u khynnah bad ym shym la pynpaw ruh ia ka rta jong katei ka nonghikai. Pynban la ong ba katei ka nonghikai ka dei kaba shim klas naduh ka kyrdan klas kaba 6 haduh klas 8 hapoh katei ka skul Freehold Intermediate School.
Ia mynta hi, la kem bad set patok ia ka hapoh Monmouth County kaba don ha Freehold Township, ha kaba ka dang ap ia ka jingbishar kaba nyngkong bad ka jingshah set patok. Yn pynlong ia ka jingbishar ban tip la kan dang shah set ne em katba ka dang ap ia ka jingbishar.
Ka shlem treikam jong u nongbishar ka la kyrpad ia ki paidbah ban ai jingtip shuh shuh halor ki kam jong ka. ”La kyntu ïa kino kino kiba don jingtip halor ki kam jong ka Havemann-Niedrach ba kin ïakynduh ïa ka MCPO Detective Dawn Correia lane ban iakren bad ai jingtip ha u number 800-533-7443,”.
Katkum ki kaiphod ba la ioh lum, la iathuh ba ka Havemann-Niedrach ka la shah thung kum ka nonghikai ba kyrpang ha ka Freehold Intermediate School naduh u bnai Risaw jong u snem 2022. Ka la hikai teng ruh ha kiwei kiwei ki skul ha katto katne snem ba la leit naduh u snem 2008, katkum ka jingthoh bad jingphla jong ka haba iakren bad ki pulit ka tnat tohkit.
Hynrei haba la tohkit ia ka, la ong ba katei ka nonghikai ka la phla ba ka ju sngewtynnad eh ia katei ka kam kaba ka trei kum ka nonghikai, kam sngewpher ia ka jingsiew ba ka ioh bad ka dei ka briew kaba trei hok, bad kaba kloi ban pashat ia ki jingtip bad jingstad kiba ka don sha ki khynnah skul.
Hadien ba la kem noh ia ka, u Asia Michael, u nongpeit jong ka Freehold Borough School District, u la phah ïa ka email sha ki nongtrei bad ki kmie ki kpa ha kaba la thoh kumne ‘Da kane la pyntip sha phi ba kawei ka nongtrei barim jong ka skul ka la shah kem noh halor ka jingshah pharep don kti ha ki kam leh be–ijot ha kaba la pynngat ia ka hapoh ki kyndon pynkheiñ aiñ kiba iadei bad ka jingleh khlem akor ka jingleh be-ijot pyrshah ia ki khynnah khynnah rit kiba dang hapoh ka 18 snem ka rta.
Namar kata, ki bor pyniaid skul ki la kyntu ia ki kmie ki kpa bad kiba ia dei kam baroh ba kin shaniah bad sngewskhem da kaba la kular ruh ba na ka liang ki bor pyniaid, la iatreilang pura bad ka shlem treikam jong u nongbishar naduh ba sdang ia kane ka jingtohkit.
Ka jingshngain bad ka bha ka miat jong ki samla pule bad ki nongtrei jong ngi ka la long ka jingthmu ba kongsan tam jong ngi, bad ngi la shim ia ki lad ki lynti mardor ban pynthikna ia ka jingiada jong ki.”
