Aizawl, Naitung:
Ka Mizoram haduh mynta ka dang ïai bteng ban ïakhun halor ka jinglynshop jong ka African Swine Fever (ASF), ha kaba ki la don kumba 3,950 tylli ki sniang kiba la ïap tang ha shiteng snem jong mynta u snem (2024).
Ki heh ba dei khmih na Animal Husbandry and Veterinary Department ki la ai jingtip ba ki la don sa kumba 21 tylli ki sniang kiba la ïap bad 93 tylli kiwei pat ki la shah set bat shah pynkynriah jaka haduh ka 30 tarik, Jylliew.
Kane ka jingwan lynshop jong kane ka jingpang ka la ktah ïa kumba 136 tylli ki shnong bad ki shnong ba bun kiba don ha kylleng ka jylla. Naduh u Kyllalyngkot jong une u snem, ki heh ba dei khmih ki la sdang ban pynkynriah jaka ïa kumba 7,649 tylli ki sniang khnang ban lait na ka jingpur sted jong ka jingpang. Kane ka jingpur jong kane ka jingpang ka dei kaba la kham neh slem naba ka la sdang naduh u snem 2021.
U khñiang jingpang uba la ktah jur ha ka por syaid, por Lyiur, u la ktah jur ïa kiba bun ki sniang ha ka jylla Mizoram. Kumba la buh jingthoh da ki heh ba dei khmih la ong ba ki la don kumba 33,417 tylli ki sniang kiba la ïap na ka daw ka jingshah ktah ha ka ASF ha u snem 2021, ha kaba la bud da 12,795 tylli ha u snem 2022, bad 1,039 tylli ha u snem 2023.
