Shillong, Naitung 02
Ki Myntri jong ka Hima Mylliem kiba kynthup ïa ki katto-katne ngut ha ka 2 tarik u Naitung 2024, ki la leit ban ujor sha ka Khasi Hills Autonomous District Council (KHADC) halor ka jingkynnoh ba u Syiem ka Hima Mylliem, u Pa’iem Ainam Manik Syiem, u la donkti ban leh sop-sop ha kaba ïadei bad ka dulir pynskhem khyndew jong ka Ïew Mylliem rim, Hima Mylliem.
Ki Myntri ki la wan ban ujor ruh sha ka KHADC halor ka jingbym lum u Syiem ïa ka Executive Dorbar bad ïa ka Dorbar Pyllun jong ki Bakhraw-Batri ban pyntip paidbah halor ka pisa kaba kot T.5,58,30,451 klur ba la ïoh na ka jingsiew bailutksan da ka Sorkar ban pynheh ïa ka surok Shillong-Dawki.
Na ka liang ki Myntri ha shwa katei ka jingwan mih sha ka KHADC, ki la phah sha ka KHADC ïa ka jingujor banyngkong ha ka 21 tarik u Risaw, 2023 ha kaba ïa ka jingbishar kam arliang mamla la pynlong ha katei ka Sngi Ba-ar ba la pynbeit da u Dy.CEM ka KHADC uba dei khmih ïa ka tnat Elaka, u Bah Pynshngaiñ N. Syiem ban tohkit bniah halor kine ki jingujor jong ki Myntri pyrshah ïa u Syiem.
Haba kren sha ki katto-katne ngut ki lad pathai khubor, u Myntri B.N Shanpru u la kynnoh ba ka jingleh kyrkieh jong u Pa’iem Ainam Manik Syiem ban ai dulir pynskhem khyndew ïa ka Raid Mylliem khlem da ïoh jingbit na ka Dorbar Hima Mylliem ka long ka jingleh donbor bad ka jingdie be-aiñ ia ka khyndew Hima kaba la kdew shai ha ka Rule 2 (37) jong ka Administration of Mylliem Syiemship Rule, 2015 bad ka jingpynkheiñ ia ka kyndon 7 (e) jong ka Mylliem Act, (Mylliem Syiemship Act, 2007 bad ia ka Rule 12 jong ka Administration of Mylliem Syiemship Rules, 2015.
U la ïathuh ruh ba ha ka jingujor kaba nyngkong sha ka KHADC, la mudui pyrshah ïa u Syiem Ainam hapoh ka Section 7 (c) bad 7 (e) jong ka ‘The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship), Act, 2007 bad katkum ka ain jong ka Sorkar Pdeng kaba iadei bad ka Right to Fair Compensation and Transparency in Land Aquisition, Rehabilitation and Resettlement Act, 2013.
“Ka jingujor pyrshah ïa u Syiem bad ïa ki katto-katne ngut ki Myntri ka long ba ngi iohi ia ki kam bad kim long kiba iahap bad ka riti ka dustur bad ka synshar ka khadar. Ka jingujor ka long ruh halor ka jingpynduh bai rneng ïa ki Myntri da u Syiem kaba paw ruh kum ka jingleh donbor. Ngi sngewsih ban iathuh ba ka jingsynshar jong u Syiem Ainam ka long palat na kaba palat liam namarba ia ka dorbar ruh um ju khot tikna bad katkum ka rul ba dei ban khot shisien shisnem hynrei kata ruh um ju khot,” u la ong.
“Ka jngkheiñ jingdiah ha ka Hima dei ban ai shisien shisnem hynrei mynta la hynriew snem u Syiem um pat ai jingkheiñ wat tang shisien ruh. Kane ka dei kaba sngewsih tam namarba ia ngi la jied da ki Kur bad ngi mihkmat ha ka Hima ban tip ia ka jingpyndonkam ia ka pisa pilaiñ bad ia ki rukom treikam hynrei ia kata ruh ngim don jingtip namarba ym don jingkheiñ jingdiah namarba um (Syiem ju khot ia ka dorbar,” la ong shuh shuh u Myntri Shanpru.
“Ha kaba iadei bad ka khyndew ka shyiap, ka long kaba sngewsih ba u Syiem u leh khlem da khot ia ka Executive Dorbar bad ka Dorbar Pyllun khamtam ia ki kam kiba heh kiba iadei bad ka Mylliem bad kiwei kiwei kiba ngi la ujor. U leh khlem ka jingpyntip lang. Ha ka jingshisha kane ka dei ka ri synshar paidbah, ka synshar lang bad ngi dei ban tip lang haba leh ia kano kano ka kam hynrei u leh khlem kano kano ka jingpyntip lang ia ngi,” la ong u Myntri Shanpru.
“Ka jinglum jinglang kam ju don hynrei na ka liang jong u Syiem u shu pynsngewtynnat tang ïa ki katto katne ban pyntyllun ïa ka kam. Ngi la aiti ka jingujor bad ka shong ha ka KHADC kaei ka ban bishar bad kan sa don biang sa kawei pat ka jingbishar kam bad ngin ïai ap biang ia kata. Ia ka ujor ngi la kdew ruh katkum ka rul jong ka Mylliem Act. Ngi kyrmen ba kane kan ym shlem shuh,” la ong u Myntri Shanpru.
