Shillong, Naitung 02
Katba ym pat dep ka jingtohkit bad aiti ïa ka kaiphod tohkit, wat ym pat pynkit ne sam ïa ki tin sop ïing sha ki nongïoh skhim, la hukum ka Meghalaya Lokayukta ïa ka tnat Housing.
Ka jingpynmih ïa kane ka hukum ka long hadien ba la shong bishar ïa ka ujor ba la mudui da u President ka Hynñiewtrep Youths’ Council (HYC) Sengkmie.
Ka jingtohkit bad ka jingaiti ïa ka kaiphod tohkit kan long hapoh ka 3 tarik u Nailur. Kumta ka tnat Housing ka dei ban pynthikna ba ha lane shwa jong kane ka tarik ym pat dei ban pynkit ne sam ïa ki tin sop ïing.
U Shongknor jong ka Meghalaya Lokayukta u Bah Bhalang Dhar ha ka hukum ba la pynmih, u la bthah ïa u Deputy Superintendent of Police (Crime) Bipul Das, ban pynlong ïa ka jingtohkit halor ka jingkynnoh pynpoi da ki tin sop ïing ba stang sha ki Community & Rural Development Block jong 7 tylli ki District ka Rilum Khasi bad Jaiñtia.
Shuh shuh u Bah Dhar ha ka hukum ba la pynmih u la ong, ïa ki tin sop ïing ha ki kudam, dei ban buh beit ïa ki kumba ki long haduh mynta; kata ym dei ban pynkit ne sam ïa ki tin sop ïing sha ki briew ba dei ban ïoh.
