Shillong, Naitung 02
Ka Sorkar Jylla kam pat phah kaiphod sha ka Sorkar Pdeng ban pan jingïarap ha kaba ïadei bad ka jingïaid lynti ka ‘erïong Remal dang shen ha kaba la don katto katne ki jingshah pynjulor.
Ka tyllong khubor ka ïathuh ba ka Jylla kam shym la pynkhreh kano-kano ka kaiphod haduh mynta namar ka jingshah lynshop ha ka ‘erïong Remal kam long haduh katta-katta kumba long kiwei ki Jylla kum ka West Bengal, Mizoram bad Tripura ha kaba ki jingshah lynshop ki la kham bun.
Na ka liang ki bor ba dei khmih ka tnat Disaster Management ki la ong ba ka jingshah ktah kaba kham bun ka dei namar ka jinghap slap lynter bad jingkhyrwit ka lyer kaba jur ha shwa ban khie ka ‘erïong Remal kaba la sdang na Bangladesh bad ktah jur ïa ki katto katne ki Jylla ha India kiba don markhap bad ka Bangladesh khamtam eh ka West Bengal kaba don markhap bad ka duriaw Bay of Bengal.
“Haduh mynta ym pat don kano-kano ka jingpynkhreh ban phah kaiphod sha ka Sorkar Pdeng namar ka ‘erïong Remal. Kaei kaba ngi sakhi na ka jingkhie ka ‘erïong Remal ka long hi kumba jia kiwei pat kiwei pat ki jingshah lynshop ha ka lyer namar ka jingïaid lynti ka ‘erïong Remal ha ki jaka khappud ka Meghalaya ruh kam da dei eh kaba khlaiñ bor,” la ong ka tyllong khubor.
Ka Mizoram ka la kyrpad ïa ka Sorkar Pdeng ban mang ` 237.6 klur kum ka jingkyrshan ïa ka Jylla na ka bynta ban pynbha pat ïa ki jingshah pynjulor ha ka por ba khie ka ‘erïong Remal ha kaba la ban sa ka jingjur slap bad ki jingtwa kiba bun ha kylleng ki jaka.
