Shillong, Naitung 03
Ka Meghalaya Swimming Association ka la pynbna ba kan pynlong ïa ka lympung ïakop jngi ba la tip kum ka 17th State Swimming Championship ha ka 19 bad 20 tarik mynta u bnai ha pung Crinoline, Shillong.
Ïa ki kyrdan ïakop jong ka Sub-Junior bad Junior jong ka Gr1 (15 haduh 17 snem), Gr II (12 haduh 14 snem), Gr III (10 haduh 11 snem) yn pynlong ha ka 19 tarik, katba ïa ka Open Category (17 snem shaneng) yn pynlong ha ka 20 tarik.
Kat kum ka kyrwoh ba la pyllait da u General Secretary ka MSA u Bah Ian A. Lyngdoh, la ong ba kat kum ka jingbthah da ka Swimming Federation of India bad kumba long ha jingïakop ba la dep pynlong, kan sdang ïa ka jingpynrung kyrteng (online registration) na ka bynta ki nongjngi. Ka bai rung kan long T. 200/- marwei.
La ong ruh ba kat kum ki kyndon jong ka SFI, uwei ne ka nongjngi ki lah ban ïashim bynta tang haduh san tylli ki jingïakop. Na ka bynta ki jingtip ba bniah ki lah ban phone ha kine number 9436192922, 9402195891 & 8787632141.
