Shillong, Naitung 03
U Chief Executive Member (CEM) ka Khasi Hills Autonomous District Council (KHADC), Bah Pynïaid S. Syiem u la pynpaw ïa ka jingangnud ban ïoh noh ïa ka ilekshon MDC namar ka por ka la biang palat.
“Haduh mynta, haba ïadei bad ka ‘Delimitation Committee’, ngi dang ap ïa ka kaiphod na ka komiti,” la ong u Bah Syiem haba kren sha ki lad pathai khubor.
U la ong ba na ka liang ka Executive Committee (EC) ka KHADC ka don ka jingshaniah ha ka komiti ha ryngkat ka jingdon u Chairman bad ki dkhot, bad kumta ka ieh ha ka jingstad jong ka.
U la ong ruh ba katkum ki lad pathai khubor, la paw shai ba na ka liang u Chairman un sa aiti ïa ka kaiphod la kumno-kumno hapoh une u bnai.
“Ngin ap ïa kata bad na ka liang jong ngi ruh baroh, ngi la sngew kwah ban pynlong noh ïa ka ilekshon namar ba la dei hi ka por. Na ka liang jong ngi, ngi long kiba la pynkhreh haba ïadei bad kane,” la ong u CEM.
Ha kawei pat ka liang, u nongïalam ka liang pyrshah ka KHADC, Bah Titostarwell Chyne haba kren sha ki lad pathai khubor u la ong ba haba phai sha ka konstitwensi kaba hap hapoh Sohra, ha ka por ba ka komiti (Delimitation Committee) ka la pynlong ïa ka jingpynsngew paidbah ha Sohra Circuit House, ki khlieh nongsynshar jong kito ki shnong kiba hap hapoh ka MDC konstitwensi bad ki bym hap ha ka MLA konstitwensi, ki la dep phah jingthoh sha u Chairman bad Secretary ka komiti ba kito ki shnong ki dang hap hi hapoh Sohra konstitwensi.
“Kumjuh ki konstitwensi kiba marjan kum ka Shella, ki la leh ïa kajuh ka bynta, kaba mut ba ka Sohra bad ka Shella ïa mynta hi kam pat don kano-kano ka jingpynkylla,” u la ong. Haba kylli, u Bah Chyne u la ong ba ka jingpynsngew ki paidbah ka thaiñ ka long ba ki kwah ba ka MDC konstitwensi kan neh beit kumba ka long.
“Lada leh lang kum ka MLA, lada phi kynmaw ba ha ka por ba ngi ïa pynbeit ha u 2014, ka jingpynduh ïa kawei ka konstitwensi ha kato ka por kum ka Laitkroh, ka la don ka jingpyrshah kaba jur na u MDC ha kato ka por (ba la khlad noh) bad ki paidbah, hynrei ka la wan dur biang hadien ba la pynbeit bad ka la mih ka Laitkroh-Langkyrdem,” u la ong. U la pynsngew ba ban pynduh ïa kane ka konstitwensi sa shisien mynta kan sa ktah shibun ïa ka jingsngew jong kiba bun balang namarba ka jinglong-jingman jong ki jaka-puta ruh ka ïahap ban don ha kato ka konstitwensi.
“Lehse da ka rit, lah ban kynthup bad lada la bun ruh, lah ban shim, hynrei ban pynduh ïa ka konstitwensi, ngam tharai kan mih ha kane ka kynti ba mynta,” ong u Bah Chyne. Shuh shuh u la bynrap ba katkum ka jingkren u Chairman ka komiti ba un sa aiti ïa ka kaiphod, kata na ka liang ka EC ka KHADC kan sa don ka jingïakren bad yn sa rah hapoh Dorbar ban ïakren halor kane ka bynta.
