Shillong, Naitung 03
Ka tnat Water Resources ka Sorkar Jylla ka dang ap ban ïoh ïa ka jingmynjur ka Sorkar Pdeng ban mang pisa kumba T. 452 klur hapoh ka skhim Pradhan Mantri Krishi Sinchayee Yojana (PMKSY) na ka bynta u snem 2024-2025.
Ha ki snem ba la dep, ka Sorkar Pdeng ka la mang pisa kumba `346 klur hapoh kane ka skhim PMKSY na ka bynta ka Jylla.
La ong ba ka jingtyrwa jong ka tnat Water Resources ka Sorkar Jylla sha ka Sorkar Pdeng ban ai jingmynjur ka dang sahteng bad na ka liang ka tnat ka buddien ïa kane, bad na ka liang u Myntri ka tnat Water Resources u Bah Comingone Ymbon ruh un sa leit ïakynduh ïa u Myntri ka Sorkar Pdeng uba dei khmih khamtam hadien ba la thaw thymmai ïa ka Sorkar NDA 3.0 bad la bujli ïa ki Myntri Sorkar kiba peit ïa ki tnat treikam bapher-bapher.
Ka tnat Water Resources ka pyntreikam bun tylli ki skhim kiba dei na ka bynta ban pynbiang um sha ki jaka rep kumjuh ruh ban pynneh ïa ka um bad thaw ki lad ban ïada na ka twa khyndew ki rud wah ha ryngkat ka jingkyrshan ka Sorkar Pdeng.
Ïa ka skhim PMKSY la pynwan da kaba pynlong lang kawei ïa ki katto katne tylli ki skhim kum ka Accelerated Irrigation Benefit Programme (AIBP) jong ka Ministry of Water Resources ka Sorkar Pdeng, ka River Development & Ganga Rejuvenation, Integrated Watershed Management Programme jong ka Department of Land Resources (DoLR) bad ka On Farm Water Management (OFWM) jong ka Department of Agriculture and Cooperation (DAC).
Ka tnat Water Resources ka pyntreikam ruh ïa ki skhim ïa ka Surface Flow Irrigation scheme ha baroh ki district nalor kine ki skhim kiba wan na ka Sorkar Pdeng kiba kynthup ïa ka Pradhan Mantri Krishi Sinchayee Yojana (P.M.K.S.Y), R.I.D.F jong ka NABARD, Command Area Development and Water Management (C.A.D.&W.M.) bad Rationalization of Minor Irrigation Statistics (R.M.I.S).
