Shillong, Naitung 03
Ka jingtreikam beaiñ jong ka Rapido kaba khlem bud katkum ki kyndon aiñ kiba la buh bad khlem ka laisen kaba biang ka la pynlong ïa kiwei pat kiba bud katkum ki kyndon ba kin duh ïa ka kamai-kajih khamtam lei-lei lada ki dei ki kompani jong ki trai jylla.
Wat la na ka liang jong ka tnat Transports ka sorkar jylla ka la ong ba kan sa phah da ka ‘Show Cause Notice’ sha u trai jong ka kompani Rapido bad maham ruh ïa ki paidbah ba kin hap ban shim hi ïa la ka jong ka jingkitkhlieh lada ki leit jingleit ne shong da ki Bike Taxi jong ka Rapido ne jong ki nongñiah thuk-thuk shimet ki bym pat ïoh ïa ka Permit na ka tnat Transports hynrei la ïohi pat ba haduh kine ki sngi, ki nongkamai Rapido kim pynsngap satia ïa kane ka jingmaham. Namar kane ka jingïai sait-lah jong ka kompani Rapido kaba pyntreikam ruh ha nongbah Shillong, ka la pynlong ïa ki dkhot jong ka Synjuk ki Nongñiah Taxi Sor bad Khapsor ba la lamkhmat da u Bah Pynsuk Youroi kynthup na ka JETS 24×7 ba lamkhmat da u samla Pynskhemlang Uriah ba kin leit ban khang tala ïa ka shlem treikam ka Rapido kaba don ha Malki ha ka Sngi Ba-ar.
Na ka liang u samla Pynskhemlang Uriah uba dei u Managing Director ka JETS 24×7, u la ong ba ka JETS 24×7 ka la ïoh ïa ka laisen naduh u bnai Ïaïong jong u snem 2023 hynrei kaba sngewsih pat ka long ba kiwei ki kompani pat ki la ïaid be-aiñ khlem ka laisen kaba biang kaba wanrah jingktah pat ïa ki Aggregator kiba ka Sorkar hi ka la ai ïa ka laisen.
“Kum ki Aggregator kiba la ïoh ïa ka laisen ka pynsngewsih ïa ngi ba ngi hap ban ïakhun bad kiwei pat ki bym don laisen. Ïa ka laisen ngi la ïoh naduh u bnai Ïaïong, 2023. Naduh ba ngi ïoh laisen, ki Rapido ki dang kamai be-aiñ ha ka jylla jong ngi. Ha ka jingshisha ïa ka jingujor ngi la phah shaduh u Myntri ka tnat Transports ha u Risaw, 2023 hynrei haduh mynta ka Sorkar kam shym la leh eiei lajan dap shi snem,” la ong u samla Uriah.
“Kum ki local start-up ngi shem jynjar bha ban ïakhun bad ki Aggregator be-aiñ. Ka Rapido haba ka khot ïa ki nongñiah thuk-thuk ban kamai kam ju pan ïa ka Permit bad ïa ka Police Verification,” la ong u samla Uriah.
U la ong ba ka jingkhang tala ïa ka Rapido ka long ban pynthikna ïa ka jingshngaiñ jong ki nongleit nongwan kiba leit jingleit da ki thuk-thuk kamai ar shaka, bad u la kyrpad ruh ïa ki nongñiah thuk-thuk kiba kamai ba kin kamai da ka lynti kaba dei ym da kaba long be-aiñ.
“Kumba ma ngi baroh ngi don ïa ka hok ban kamai jakpoh tangba ngi dei ban ïaid da ka lynti kaba dei,” la ong u samla Uriah. Shuh shuh hadien ka jingkhang tala ïa ka ophis Rapido, na ka liang ka Synjuk ki Nongniah Kali Sor bad Khapsor ki la leit ban ïakynduh sa ïa u Executive Member jong ka KHADC u ba khmih peit ïa ka tnat Labour, u Bah Victor Rani ban dawa ba u dei ban shimkhia halor kane ka bynta.
