Shillong, Naitung 03
Ki nonghikai skul SSA kiba don hapoh ka synjuk jong ka All Meghalaya SSA School Teachers Association (AMSSASTA) ha ka Sngi Ba-ar ki la leit ban aiti da ka dorkhas ha u Myntri ka tnad pule puthi ka jylla, u Rakkam A. Sangma ha kaba ïadei bad ka jingdawa ban kyntiew noh ïa ka tulop jong ki nonghikai skul SSA kaba khlem pynkiew shuh mynta la phra snem kynthih kata naduh u snem 2016.
Ha shwa katei ka jingleit aiti ïa ka dorkhas ha u Myntri, ka kynhun ka la hap ban ap da ki kynta tang ban ïoh ïa ka lad ban ïakynduh ïa u Myntri hynrei tad kham hadien katto-katne por eiei, ka kynhun ka la ïoh ïa katei ka lad.
Ha katei ka dorkhas ba la aiti ha u Myntri, ka AMSSASTA ka la kdew ba ka jingpynkiew tulop ka la long nyngkong eh ha u snem 2017 bad naduh u snem 2018 ka Sorkar kam shym la pynkiew shuh ïa ka tulop jong ki nonghikai skul SSA.
Na ka liang u President jong ka Synjuk, u Bah Peter Thyrniang u la ong ba ka jingbym shah pynkiew tulop jong ka kynhun la phra snem kynthih ha ka sorkar jylla la buh jingeh shikatdei eh ïa ki nonghikai ba kin pyndap ha ïing-ha sem khamtam ha kane ka juk kaba kiew dor lut ki mar-mata bad ki marbam-mardih.
“Haba ngi ïanujor bad ka por naduh u 2017 haduh kane ka sngi kaba mynta, ka dor jong ki mar ki mata ka la kiew mar shiteng, kane ka pynlong ïa ngi ki nonghikai ba ngin shem jingeh ban pyndap ïa ka ïing ka sem bad ki jingdonkam baroh na ka por sha ka por.
“Ngi la shakri ha ki skul SSA la palat arphew snem bad ngi la noh synñiang sha u sup u thiar jong ka pule ka puthi nalor kiwei pat ki kam ba la bynshet ha ngi. Namar ka jingkiewdor jong ki marbam mardih, ngi kyrpad ban kyntiew ïa ka jingsiew tulop kaba long shispah na ka shispah,” la pynpaw ka Synjuk ha ka dorkhas.Katba na ka liang u Bah L. Marngar, u la ïathuh ba ka Synjuk ka la pynsngew ruh ha u Myntri ha kaba ïadei bad ka hukum jong ka Supreme Court na ka bynta ki nonghikai kiba pas ïa ka eksamin Diploma in Elementary Education ba la pynlong ha ki snem ba la dep da ka National Institute of Open Schooling ba kin ym shah ktah na kane ka hukum.
“Ki don da ki phew hajar ngut ki nonghikai SSA kiba la pyndep ïa ka eksamin D.El.Ed. ki ban shah ktah lada pyntreikam salonsar ïa ka hukum jong ka Supreme Court naduh ki snem kiba mynshwa. Ka jingkyrpad jong ngi ka long ba ka Sorkar ka pyntreikam ïa ka hukum shakhmat ym shadien,” la ong u Bah Marngar.
Na ka liang katei ka kynhun ka la ïathuh ba utei u Myntri u la ai ïa ka jingkular ba un sa rah ïa kane ka mat jingdawa jong ki nonghikai hakhmat ka Kynhun Myntri jong ka sorkar jylla na ka bynta ban ïathir ïatai ha shwa ban shim ïa kano-kano ka rai.
