Shillong, Naitung 03
Ki ar kol ba la thep da u Merih Demiral ka la biang pura ïa ka Turkey na ka bynta ban jam sha ka quarter final ha ka Euro 2014 hadien ba ka la lah ban pynliem noh ïa ka Austria da 2-1 kol ha ka Sngi Balang.
Kumta ka Turkey kan ïaknieh rung semi final pyrshah ïa ka Netherlands, kaba la lah ban pynliem ïa ka Romania da 3-0 kol ha ka miet jong ka Sngi Ba-ar.
Ha kane ka jingïakhun pre-quarter final u Demiral u la ïoh ban pynkhih jar tang mar ïasdang ka jingïalehkai ha ka 57 sekhon bad kane ka long ka kol kaba stet tam ha kane ka lympung jong ka European Championship.
Une rangïalehkai shakhmat u la pynbud biang ïa ka kol ba ar ha ka kylla miet. Katba ka Austria ka la lah ban pynphai kylla shi kol lyngba u Michael Gregoritsch, hynrei kane ka shi kol kam shym la biang ïa katei ka kynhun ban jop ïa ka Turkey.
Lyngba kane jingshah rem ka jingïaid lynti ka Austria ha ka European Championship ka la poi noh sha kaba kut. Kane kynhun ka la thrang ruh ban khur ïa ka jingjop kaba nyngkong ha ka pre-quarter final ha ka lympung kaba heh naduh u snem 1954.
Tang mar ïasdang ka jingïalehkai ka Turkey ka la ïoh ban pynkhih jar nyngkong eh lyngba u Demiral uba la ïoh ban shut sha kol. Kane ka shi kol ka la pynkyndit bynriew ïa ki rangïalehkai ka Austria. Hynrei haduh kaba kut jong ka kylla step ka Turkey ka dangtam da shi kol ïa ka liang pyrshah.
Hadien ba la bteng ïa ka jingïakhun jong ka kylla miet u Demiral u la pynbud biang ïa ka kol kaba ar ha ka minit kaba 59 bad ia kane la ïarap da u Arda Galer. Hadien hynniew minit ka Austria ka la lah ban pynphai kylla lyngba u Grego-ritsch hadien ka jingïarap lang da u Stefan Posch. Haduh kaba kut ka Austria kam shym la lah ban pynurlong bad ka la mad ïa ka jingshah rem.
