Shillong, Naitung 03
Ha Meghalaya lehse kham ñiar ban shem ba ki don ki briew kiba kamai katba mon ïa ki taksi ar shaka (bike taxi), katba kiwei pat ki kiba ñiah kali kamai kum ki taksi saw shaka bad kiwei ki da bud ïa ki kyndon jong ka aiñ bad ki siew tista ïa ki khajna.
Ha Shillong ki la mih da ki spah tylli ki nongñiah ar shaka kiba kynthup ïa ki scooty bad ki bike kiba ïaid ha surok ban kamai mynta la katto-katne snem.
Kiba sdang nyngkong ban kamai ki dei kito kiba pynrung kyrteng bad kawei ka kompani Rapido kaba don shabar Jylla na ka bynta ban kamai ha kane ka nongbah Shillong.
Haduh mynta ym pat shai satia la ka Sorkar Jylla ka la ithuh ne ai laisen ne em ïa ka Rapido kum kata ka bike-taxi aggregator ban kamai.
Ka jingshim kabu kiba ñiah ar shaka ban kamai khlem da bud ïa ki kyndon aiñ ka dei kaei-kaei kaba buh jingma ruh ïa kito kiba kyrkieh kam kiba hap ban shim da kine ki ar shaka ban phah leit buh sha ki jaka ba ki thmu ban leit khnang ban poi kloi namar ba jur eh ka dheng kali.
Ka Sorkar Jylla ha u snem 2023 ka la dep ban mynjur ïa ka kyndon aiñ kaba tip kum ka Meghalaya Taxi Aggregator Operation Rules ha kaba yn shah ïa ki nongñiah ar shaka ban kamai da kaba pynrung kyrteng shwa bad kano-kano ka kompani kaba la ïoh laisen na ka Sorkar.
Kumta ka Sorkar Jylla ka la ithuh ruh ïa ki ar tylli ki kompani trai Jylla kita ka Jetz 24×7 bad Anyride kiba la ïoh laisen ban pynrung ïa ki nongñiah ar shaka ban kamai da kaba pyndonkam ïa ka App jong ki.
Hynrei ka tyllong khubor kaba ïajan bad ka tnat Transport ka la ong ba haduh mynta ym pat lah satia ban tehlakam ïa kiba kamai beaiñ kynthup ruh kito kiba kam ïalade ba ki dei ki nongñiah ar shaka kiba kamai ha ka kyrteng jong ka kompani Rapido.
Kiba bun ki samla kiba la bud ïa ki kyndon aiñ jong ka Sorkar Jylla ban kamai taksi ar shaka ki la pynpaw ka jingdiaw namar ki don bun kiba kamai taksi ar shaka ha ka kyrteng ka jakpoh khlem da bud ïa ki kyndon aiñ.
Kaba kham pynsyier pat ïa kito kiba ju leit da kine ki taksi ar shaka ka dei ka jingbym pat lah ka Sorkar Jylla ban pyrkhing khamtam ban pynïapher hapdeng ki ar shaka shimet ki bym dei ki taksi bad ki taksi ar shaka kiba kamai.
“Lada don mano-mano ba shim kabu ban leh kam sniew da kaba kamai kum ki taksi ar shaka khamtam namarba mynta la jyllei ki kam sniew, kam long kaba shngaiñ ban shong da kine ki ar shaka ban leit jingleit namar ïoh ki don pynban kiba rahbor ne leh kino-kino ki kam runar,” la pynpaw kiba bun ki ‘riew paidbah kiba la ju siew pisa ban phah leit buh da ki ar shaka.
Kiba bun ki nongshong taksi ar shaka ki la pyni nuksa ba ha kiwei ki Jylla, kiba kamai da ki ar shaka ki bud ïa ki kyndon ka Sorkar bad ruh ïa ka rukom pynïaid jong kito ki kompani (aggregator) kum ka jingpynpher ïa ka helmet ne pynpher ïa ka rong jong ki number plate, nalor kaba phong ruh da ki ‘uniform’, katba ha Meghalaya pat ki don kiba kamai beaiñ bad kim salia ban leh beaiñ ha ka kyrteng jong ka kamai jakpoh.
Haduh mynta ki don ruh ki nongñiah taksi ar shaka kiba la pynrung kyrteng bad ka kompani Jetz 24×7 bad ka kompani Anyride na ka bynta ban kamai taksi ar shaka.
Ki bor ba dei khmih ka tnat Transport ki la ong ba kane ka rukom leh jong kiba kamai beaiñ kynthup ruh kito kiba kamai ha kyrteng jong ki kompani kiba nabar Jylla ka dei kaba ka tnat kan sa khmih bniah ha kine ki sngi bad shim ïa ki sienjam kiba donkam ban leh.
Ki ong ba kine ki taksi ar shaka ki donkam ban pynpher na kiwei pat ki ar shaka ki bym kamai bad kito kiba kamai ki hap beit ban pynrung kyrteng bad ki kompani hangne ha Jylla kiba la ithuh da ka Sorkar Jylla.
