Nongpoh, Naitung 03
Hadien saw sngi ba la shah rong ha ka wah Umïam, ki bahaïing bahasem ha ka Sngi Balang, ki la lap noh ïa ka met jong u Bah Khring Lyngshiang, 39 snem ka rta na ki bynta ba kham sharum jong ka wah Umïam.
Kum ban shu kdew, u Bah Khring Lyngshiang u dei na ka shnong Khyndewso, Ri Bhoi District, u la shah rong noh ha ka umsaw jong ka wah Umïam hadien ka jingther jong u ‘lapbah ha ka 30 tarik jong u bnai Jylliew, 2024 kaba dei ka Sngi U Blei bad naduh katei ka sngi, ym shym la lapdien shuh ïa ka met ka jong u. Na ka liang jong ki bahaïing bahasem bad ki paidbah nongshong shnong, ki la pynlong ïa ka jingleit wad ïa ka met jong utei rangbah naduh ka Lah Sngi U Blei bad dei tad haduh mynta ka sngi, kata saw sngi thik, ba ki bahaïing bahasem ki la lap noh ïa ka met jong u.
Shuh shuh, la ïathuh ba hadien ba la rah ïa katei ka met sha ka ïingsah ka jong u ha Khyndewso, na ka liang ki pulit ka thanat Mawlasnai ruh ki la wan ban pynlong ïa ka jingtohkit bad namar ka jingkyntait jong ki bahaïing ban leh ïa ka post-mortem namar kim don kano-kano ka jingsuba sniew, na ka liang ki pult ruh hadien ba la pyndep ïa la ka kamram, ki la aiti noh ïa ka met sha ki bahaïing na ka bynta ba kin pyndep ïa ka jinglehniam kaba khatduh ïa ka met jong utei u rangbah.
