Shillong, Naitung 03
Ka kynhun ïalehkai kriket ka ri India kan wanphai ha ka nongbah Delhi lyngba ka liengsuiñ kaba la mih na Grantley Adams International Airport kaba ha Barbados ha ka Sngi Balang.
Kane ka kynhun ka la sahkut haduh lai sngi na ka daw ka jingwan lynshop ka erïong erngit (category 4 hurricane) hadien ba ka la rah ïa ka nam lahduh ha ka T20 World Cup, da kaba ka la lah ban pynliem ïa ka South Africa ha ka jingiakhun final kaba la long myn ha ka sngi Saitjaiñ ha Barbados.
Ka liengsuiñ kaba kyrpang jong ka Air India, ïa kaba la pynitynnad kum ka AIC24WC — “Air India Champions 24 World Cup”, ka la mih ha ka por 4:50 mynstep bad la khmih lynti ba kan wanpoi ha katei ka nongbah jong ka ri ha ka sngi Palei ha ka por 6:20 mynstep.
Na ka liang u kapten u Rohit Sharma ula pyllait ïa ka dur ha ka Instagram, ha kaba u la bat lang bad ka trophy hapoh ka liengsuiñ, kaba la thoh “Coming home.”
Ïa katei ka liengsuiñ la pynkhreh da ka BCCI, na ka bynta ban kit ïa katei ka kynhun kaba kynthup naduh ki coach, kiba haïing hasem jong ki rangïalehkai, ki nongïalam bad ki dkhot kiba long ki nongpathai khubor. Ïa kane ka kynhun ba la ïalam da u Rohit Sharma ka la rah ïa ka nam lahduh hadien ba ka la lah ban pynliem noh ïa ka South Africa da 7 run ha ka final kaba la long ha ka sngi Saitjaiñ.
