Shillong, Naitung 03
Ki nongshong shnong ka thaiñ Majai, Hima Sohra ki la pynpaw ka jingsngewkhia halor ka jingkieng Umdud kaba pynïasoh ïa ka surok na Sohbar sha Majai kaba don hapdeng ka jingsyier namar ka jingkynnoh kit palat pud jong ki trok kiba ïaid lyngba jong ka.
Hashuwa, katkum ki khubor ba la mih, ki paidbah ka thaiñ Majai, Hima Sohra ki la ud ba ka jingkieng Umdud ka don hapdeng ka jingsyier bad lah ban dkut ha kano-kano ka por na ka jingïaid ki trok kit mawshun sha Bangladesh lyngba ka shnong Majai khamtam kiba kit palat pud.
Hadien kane, na ka liang ka shlem treikam u Executive Engineer PWD (Roads), Sohra Division ka la leit sieh da ka ‘Signboard’ ha ryngkat ka jingmaham ba ki kali khamtam ki trok kim dei ban kit palat ïa ka 12 ton.
Pynban ha kine ki sngi ba la dep, ki nongshong shnong lyngba ki dur ki dar bad ki dur-khih, ki la kdew ba katei ka jingkieng ka la sdang ban julor ha ki bynta sha khrum na ka jingkhlong ka um namar ka jingjur slap.
Ha kajuh ka por, ki nongshong shnong ki la pynpaw ka jingbynñiaw halor ka jingleh kyllut ki bor ba dei khmih haba ïadei bad ka jingma ïa ka jingkieng nalor ka surok kaba la jot rathai naduh ki bynta jong ka Sohbar najan ka jingkieng Wahrew haduh Lailad, Majai.
Ki la ong ruh ba ka surok kaba wan na ki bynta ka thaiñ Ichamati shaduh Lailad, Majai ka la sniew shaba palat wat la katei ka surok ka don ha ka jingpynkhreh ban shna noh da ka tnad PWD. Nalor kane, ki la ong ba hapdeng ka jingjur u slap uba la khlong ïa ka surok da ka jingheh ka um ka la wanrah jingeh ïa ka ïaid ka ïeng bad don ruh ka bynta jong ka surok kaba la jan dkut shiliang.
Shuh shuh ki nongshong shnong ki la kyntu ïa ka Sorkar lyngba ka tnad PWD (Roads) ban shimkhia ïa kane ka kam shuwa ban mih kino-kino ki jingjia na ka jingsniew ka surok bad jingtlot bor ka jingkieng Umdud.
