Ka jingtrei shitom ka donkam ïa ka jingtheh syep theh syar ka bym kai ban ïoh ïa ka kamai ka kajih kaba bit ba biang bad ka bakhuid ba suba khlem da donkam ban shukor ban thok ïa ki para briew. Da ka jingtrei minot, ki don kiba la lah ban pynïeng ïa ki kam ki jam ha ki bynta bapher-bapher. Hynrei ynda la ïohi ba ka jingtrei shitom ka wanrah ïa ka spah ka phew, ki mih pat sa ki nongdawa bam ei ki bym kwah ban trei shitom wat tang shi tyrsim khmut ruh tangba kiba kmen ban ïoh bam ei ïa ka kamai ka jong kiwei. Kita ki nongseng kam seng jam, wat lada ki la trei shitom miet la bad sngi ban pynïeng ïa ka kamai ka kajih, kim banse ban sam sha kita ki nongdawa bam ei namar kim kwah ban mih kano-kano ka jingeh ha ka jingtrei jong ki. Kane ka dei kawei na ki daw bah kaba pynsalia ïa kiba bun ban tur sha ki kam lajong namar ka long kumba ki hap ban kamai na ka bynta kiwei bad ym ïalade bad ka ïing ka sem.
Ka jingjur jong ki nongdawa bam ei ka paw hadien ba katto katne bnai mynshwa, ka District Magistrate ka East Khasi Hills ka la mana ïa kino-kino ki briew ne kynhun ban dawa ne leit khrong pisa na ki trai dukan be-aiñ bad la maham ruh ban kem naphang lada lap ïa kiba donkti. Ha ka hukum, ka District Magistrate ka East Khasi Hills, ka la pyntip ba ki la don ki jingujor halor ka jinglum pisa na ki trai dukan bad kiwei ki shlem kiba don bynta ha ki kam khaïi pateng ha ka kyrteng jong ka jingpan jingïarap pisa ne ka jingai da ki shithi dawa pisa, bad kane ka la buh jingeh ïa ki trai dukan bad ha kajuh ka por ka la wanrah ïa ka jingsngew syier.
Ka District Magistrate ka la ong ba kino-kino ki jinglum pisa ha baroh kawei ka East Khasi Hills kiba khlem da ïoh jingbit lypa na ka shlem treikam jong ka Deputy Commissioner, East Khasi Hills lane da kiwei pat ki bor sorkar, ki long kiba be-aiñ. Ka la pynshai ruh ba kano-kano ka jinglum pisa ba la ai jingbit da ka Deputy Commissioner ne kiwei pat ki bor ba dei khmih ki long tang na ka bynta katto-katne por bad na ka bynta ki katto-katne ki jingthmu kiba shai. Ha kajuh ka por, ka Deputy Commissioner ka la bthah ïa baroh kiba dukan ba kin buh da ki CCTV ha ki shlem jong ki ha ki jaka kiba biang khnang ba kan don jingshngaiñ bad ban lap ruh lada don kino-kino ki jingleh be-aiñ. Ka Deputy Commissioner ka la pynmih da ka hukum hapoh ka kyndon 144 Cr. PC ha kaba la khang pyrshah ïa ka jingdawa pisa na ki dukan ne kiwei pat ki shlem kiba don bynta ha ki kam khaïi pateng. Lada lap ïa kiba donkti, ka District Magistrate ka la ong ba yn kem bad pynshitom ïa ki katkum ki kyndon aiñ.
Ka long ka jinglehraiñ ka bakhraw ban ïohi ïa kiba kum kine ki hukum namar ngi sngewthuh ba la nang roi kita ki nongdawa bam ei ki bym kwah ban khih ban ksar, ban trei shitom, ban pynjaw syep pynjaw snam ban ïoh ïa ka kamai ka kajih ka bakhuid ba suba bad ka bym ktah ïa ki para briew. Ha kajuh ka por, sngewsynei ïa kita ki nongshah dawa namar ym shym la phah seng kam ïa ki ban bsa ei ïa ki nongdawa bam ei. Tangba dei tang ka jingbym banse ba ki hap ban sei na pla ba kin lait ïalade na ka saw ka sian, ka pang ka mynsaw. Kane ka jingkwah im ba heh ba haiñ da kaba pyndonkam ïa ka umsyep jong kiwei ka long kaba ma. Ka shu long ba kita ki nongdawa bam ei kim pat ïakynduh bad kiba kham shlur bad kiba nud ban kyrngah wat lada ki dawa sa da ki spah sien. Ynda ki la ïakynduh bad kiba kham shynrang ka mynsiem, hangta kin sa sngewthuh bad pei shkor ba pleng kam long kaba bha ban shu ap thap narud bad leh pahuh pahai da ka umsyep jong kiwei. Kine ki nongdawa bam ei kim don shuh ïa ka jingïatiplem.
Hadien jong katei ka hukum na ka District Magistrate, ngin hap ban ïa peit la kita ki nongdawa pisa bad nongbam ei ïa ka umsyep jong kiwei kin duna ne kin neh kumjuh ne kin nang bun arshah. Ki pulit ki dei ban kem naphang ïa ki nongdawa bam ei bad ban pyni paidbah ïa ki namar ki dei ki nongkjit ïa ka spah ka phew jong kiwei, bad ki long ruh ka daw bah jong ka jingkiew dor ki mar ki mata kynthup ki marbam mardih ha kane ka jylla. Kyrmen ba kito kiba shah dawa pisa ha ki nongbam ei kin wan mih shakhmat ban ujor sha ki pulit bad ba ki pulit kin leh ïa kaba donkam da kaba tyngeh. Wat mut ba baroh kiba don spah don phew ki leh ïa ki kam ar nombor ne ki kam be-aiñ ban kiew ka spah ka hajar. Ki don kiba da trei shitom bad trei dukhi ban ïoh ïa ka kamai kajih kaba biang. Wat ailad ïa ki nongdawa bam ei ban dakhol ïa ka jingtrei shitom jong phi.
