Shillong, Naitung 03
Ki pulit ka Ri-Bhoi distrik ki la lap ïa ka metïap jong uwei u rangbah bym lah ban ithuh satia na kawei ka ïing kaba ha 10 Mer jong ka surokbah NH-37.
“Hapdeng ka jingtohkit, la lap ïa ka metïap jong uwei u rangbah u bym lah ithuh satia uba ha ki rta 45 snem kaba thiah lyngktar ha madan jong kawei ka ïing kaba la shu ieh noh kumto kaba don hajan NRL Petrol Pump, 10 Mer, NH-37,” laong u SP ka Ri-Bhoi, u J.S. Dhanoa.
U la ong ruh ba ka met jong utei u rangbah ka la sdang ban pyut wat la ym shym la don kano-kano ka dak jingmynsaw.
Ha kajuh ka por, u la ïathuh ba la shon dur ïa ka met bad la shim ruh ïa ka PO, bud sa ka jingtohkit ha ka jingdonlang ki nongsakhi laitluid.
Hadien kane, la pyni ïa ka dur jong utei u rangbah sha ki shnong marjan bad ki sawdong-sawkun jong ka thaiñ 10 Mer, hynrei ym shym la don ba wan shakhmat ban pynithuh. Kumta hadien ba la pyndep lut ïa ki jingdonkam baroh, la pynkit noh ïa ka met sha Civil Hospital Nongpoh na bynta ka ‘Post Mortem’ bad la buh ïa ka ha jaka buh metïap ka ban sa leh ïa ka Post Mortem lashai ka sngi.
La phah ruh ïa ka khubor sha baroh ki OC bad IC ka Meghalaya bad Assam haba ïadei bad utei u rangbah ban leh ïa kaba donkam.
