Shillong, Naitung 03
Ka jingïaid lynti ka Costa Rica ha ka Copa America ka la poi sha kaba kut wat la ka la jop ha ka jingïalehkai kaba khatduh jong ka Group-D hadien ba ka la lah ban pynliem noh ïa ka Paraguay da 2-1 kol ha ka Copa America.
Kane ka jingbym lah ban ïoh rung ka la wan hadien ba ka Brazil ka la ïakhaid mar 1-1 kol pyrshah ïa ka Colombia.
Kumta ka Colombia ka la ïoh ban bat ïa ka kyrdan ba ha khlieh ryngkat bad 7 point bud sa ka Brazil kaba don 5 point, bad kine ki kynhun ki la ïoh rung sha ka quarter final.
Ka Costa Rica ka la wan ha ka kyrdan balai ryngkat bad 4 point, katba ka Paraguay ka la wan sha trai bad khlem jop eiei na ki lai sien ïakhun.
Ha kane ka jingïakhun ka Costa Rica kaba la khmih lynti ban ïoh rung sha ka quarter-final, ka la ïoh ban pynkhih jar nyngkong eh tang mar ïasdang ka jingïalehkai lyngba u kapten u Francisco Calvo ha ka minit kaba 3 bad ia ka kol kaba ar kala pynbud ha ka minit kaba 7 lyngba u rangïalehkai ba dang 19 snem ka rta u Josimar Alcocer.
Ka Paraguay ka la lah ban pynphai kylla ha ka kylla miet lyngba u Ramon Sosa ha ka minit kaba 55. Haduh kaba kut kane ka kynhun kam shym la lah ban thep kol shuh bad ka la mad ïa ka jingshah rem.
Ka jingïakhun quarter final kan sdang naduh 5 tarik mynta u bnai ha kaba ka Argentina kan ïakhun pyrshah ïa ka Ecuador (6:30AM), katba ha ka sngi kaba bud ka Venezuela kan ïakynduh ïa ka Canada (6:30AM). Ha ka 7 tarik ka Columbia ïa ka Panama (3:30AM), katba ka Uruguay ïa ka Brazil (6:30AM).
