Nongpoh, Naitung 03
Ka jingkilan met kaba 16 jong ki shipai ka India bad Mongolia ïa kaba la tip kum ka Nomadic Elephant 2024, ka la sdang ha ka step Sngi Balang ha ka jaka ai jinghikai kaba kyrpang jong ki shipai kaba don ha Umroi, Ri Bhoi District. U nongkit ‘tien Syiem (Ambassador) ka ri Mongolia sha India, u Ganbold Dambajav u la wan ban plie ïa kane ka jingkilan met jong kine ki ar tylli ki kynhun shipai.
Utei nongkit ‘tien Syiem ka ri Mongolia, u Ganbold Dambajav u la ïathuh ba ka jingpynlong ïa kane ka jingkilan met, ka long kum shi bynta pynskhem ïa ka rukom treikam ka jong ki shipai jong kine ar tylli ki ri bad ruh ban wanrah ïa ka jingïadei kaba ïajan wat ha ki bynta jong ka kam saiñ hima sima, ka ïoh ka kot, ka pule puthi, ka koit ka khiah bad kiwei kiwei.
U la pyntip ruh ïa kane ka jingkilan met Nomadic Elephant, la sdang nyngkong ha u snem 2006 bad pynpaw ïa ka jingïadei jong ka ri Mongolia bad ka ri India naduh ki hajar snem kiba mynshwa bad khmih lynti ruh ba kane ka jingïadei kan ïai bteng na uwei u snem sha uwei pat.
Kane ka jingkilan met ka dei shibynta na ka bynta ban pynkhlaiñ ïa ka rukom treikam jong ki shipai, khamtam ban wanrah jingsuk ha ki ri kiba don jingkynad kiba hap hapoh ka shatri jong ka United Nations. Kane ka jingkilan met, ka ai ïa ka rynsan na ka bynta ki shipai jong ka ri Mongolia bad India ba kin ïoh ban sam ïa ki buit treikam mar kylliang.
Utei u nongkit ‘tien Syiem ka ri Mongolia, u la pynpaw ruh ïa ka jingkyrmen skhem ba ki shipai kiba don bynta ha kane ka jingkilan met, kin ïoh shibun ki jingmyntoi bad jinghikai ha kine 14 sngi lynter, kata naduh mynta ka 3 tarik haduh ka 16 tarik jong u Naitung, 2024.
Ha kane ka jingkilan met Nomadic Elephant kaba 16, na ka liang jong ka ri India la wan ban ïashim bynta da 45 ngut ki shipai jong ka Sikkim Scouts bad kiwei kiwei ki shipai, katba na ka ri Mongolia pat la wan ban shim bynta da ki shipai na ka 150 Quick Reaction Force Battalion.
