Shillong, Naitung 03
Ka aïom ïalehkai 2024-25 jong ka BCCI ki long kiba kongsan na ka bynta ka kynhun ïalehkai kriket ka Jylla bad na ka liang ka Meghalaya Cricket Association ka la pyllait ïa ka thup kyrteng jong 30 ngut ki rangïalehkai.
Kane ka aïom ka long kaba kham kyrpang namar ka Meghalaya ka la ïoh rung sha ka Elite Category jong ka Ranji Trophy 2024-25 hadien ba ka la wan ha ka kyrdan ba-ar ha ka Plate Group jong ka aïom ïalehkai 2023-24. Kane ka kynhun ka la lah ban ïalehkai bha mynshem snem wat la ka pynïalehkai tang da ki rangïalehkai kiba dei beit tang napoh kane ka Jylla khlem da wanrah ïa kiwei kiba nabar Jylla.
Te kumta ka Ranji Trophy kan dei ka lympung kaba heh duh na ka bynta ka kynhun ïalehkai ka Jylla, ha kaba kan sdang naduh 11 tarik u Risaw. Hadien yn pynbud sa ka T20 Syed Mushtaq Ali Trophy ka ban sdang naduh 23 tarik u Naiwieng bad ka Vijay Hazare Trophy ka ban sdang naduh 21 tarik u Nohprah.
Na ka liang ka MCA, hadien ba ka la mynjur ïa ka ad hoc selection committee, ka la pyllait ïa ka thup jong ki 30 ngut ki rangïalehkai na ka bynta katei ka lympung hadien ba ki la lah ban ïalehkai bha ha ka aïom ïalehkai 2023-24 bad ruh kiba la lah ban pynpaw ïa ka jingtbit ha kawei na ki jingïalehkai kaba la long dangshen ha Jagiroad, Assam.
Te kumta ka MCA kan pynlong ïa ka jingkilanmet ban pynkhreh ïa katei ka lympung hashwa ba kan leit ïashim bynta sha katei ka lympung.
Kane ka kynhun ka kynthup naduh ki rangïalehkai kiba kham rangbah kum u Wallambok Nongkhlaw haduh kiba dangkhynnah kiba la lah ban ïalehkaki ha ki lympung ïalehkai U-23 tournament kiba la long ha u snem ba la lah kum u Nishanta Chakraborty. La kynthup lang ruh ïa ki rangïalehkai kiba la lah ban ïalehkai bha ha ka Plate Group jong u snem ba la lah kum u Kishan Lyngdoh, Dippu Sangma bad u Akash Kumar Chaudhary.
Ki kyrteng ki 30 ngut ki rangïalehkai ka Jylla ki long u Chaman Pushp, Swarajeet Das, Aryan Borah, Bijon Dey, Nishanta Chakraborty, Jaskirat Singh Sachdeva, Adarsh Joshi, Kishan Lyngdoh, Arpit Bhatewara, Bamanbha Shangpliang, Himan C Phukan, Shambhalang Pyngrope, Wallambok Nongkhlaw, Anish Charak, Arbin Singh, Sylvester Mylliempdah, Riboklang Hynniewta, Rohit Shah, Akash Kumar Chaudhary, Ram Gurung, Robert Sangma, Pankaj Mandal, Roshan Warbah, Dippu Sangma, Ibitlang Thabah, Arien Bonchang Sangma, Yogesh Tiwari, Md Nafees Siddique, Chengkam Sangma & Lerry Sangma.
