Agartala, Naitung:
Ka kynhun Government Railway Police (GRP) kaba la shah pyntreikam ha hynriew tylli ki jaka treikam jong ki pulit kiba don ha Tripura ka la ïoh kem ïa 434 ngut ki bar ri kynthup ki nong Bangladeshi bad ki Rohingya ha ki shi snem san bnai ba la leit hadien ba ki la rung sha ki bynta jong ka Tripura ha kaba ki la rung beaiñ lyngba ki bynta khappud. U heh pulit na ka tnat pulit ha Tripura ha ka jingïakren bad ki nongthoh khubor, u la ong bah ha ki shi snem, san bnai ba la leit, ki la ïoh ban kem ïa kumba 434 ngut ki bar ri.
“Ha u snem 2023 ka kynhun GRP ka la shah pyntreikam ha hynriew tylli ki jaka treikam jong ki pulit ka Tripura ha kaba ki la ïoh ban kem ïa 294 ngut ki bar ri kynthup ïa 76 ngut ki Rohingya katba kiwei pat ki dei ki nongshong shnong jong ka Bangladesh. Bad naduh u Kyllalyngkot jong u snem 2024 haduh mynta, ngi la ïoh kem ïa kumba 140 ngut ki bar ri bad napdeng kine, lai ngut ki briew la ithuh ba ki dei ki Rohingya”, la ïathuh u heh pulit.
