Shillong, Naitung 03
Ka Laitumkhrah SC ka la pynjem khnap ïa ka Lumkseh SC haduh shiteng dorjon kata da 7-0 kol na ka bynta ban khur ïa ka jingjop kaba nyngkong ha ka lympung ïalehkai SSA Under-20 Fourth Division ha ka sngi Balang.
Ha kane ka jingïakhun kaba long ha madan MFA, Polo ka Manbhakupar Malngiang u la khur ïa ka hat-trick da kaba thep marwei haduh saw kol kata ha ka minit kaba 1, 3, 19 & 51. Ïa ki ar kol la thep da u Iashanbor Buhphang (42 & 45) bad ia kawei pat la thep da u Hamlet Thabah (60).
Ha kawei ka jingïakhun kaba la long ha First Ground, ka Laitkroh SC ka la pynliem noh ïa ka Pynthorbah SC da 4-0 kol. Ïa kine la thep mar ar kol da u Cheristar Nongkynrih (16 & 50) bad u Rishailan Myrthong (23 & 58).
Haba phai sha kawei pat ka jingïakhun kaba la long kham hashwa hapdeng ka Laitlulong SC bad ka Mawklot SC ki la ïasam mar shi point hadien ba ki la ïakhaid mar 1-1 kol. Ka Mawklot ka la pynkhih jar nyngkong eh lyngba u Kerry Dohling (65), hynrei shwa ban wai u Samuel Lyngdoh (70+2) u la lah ban pynphai kylla na ka bynta ban pynïakhaid mar shi kol ïa ka Laitlulong.
Ka jingïalehkai ha ka sngi Palei kan long hapdeng ka Mawphlang SC pyrshah ïa ka Pommura SC ha First Ground ha ka por 1:45 mynsngi, katba ka Mawkasiang SC ïa ka Diengpasoh SC ha ka por 4 baje bad ka Risa Colony SC ïa ka Riatsamthiah SC ha madan MFA ha ka por 4 baje janmiet.
