Tinsukia, Naitung 03
Ha kawei ka jingjia ba sngewsih, 2 ngut ki nongtih dewïong, ïa kiba la ngeit ba ki dei na Meghalaya, ki la khlad noh namar ka jingsuba ngat lyer bih (suspected gas poisoning) ha Tinsukia District, Assam.
Katkum ka khubor na ka ‘NE NOW’, kane ka jingjia ka la jia shi bnai hadien jong kawei ka jingjia ba sngewsih (kaba ïasyriem) kaba la jia ha kajuh ka jaka ha kaba 3 ngut ki briew ki la duh noh la ka jingim, ba kynthup ïa 2 ngut kiba na Meghalaya.
Ïa kitei ki nongtih dewïong la lap hapdeng ka jingbym tip briew ha ka thaiñ Dharna Basti jong ka Lidu Pahar ha Tinsukia ha ka janmiet 1 tarik Naitung, katkum ki khubor.
La pynkit noh mar-mar ïa ki sha Margherita First Referral Unit (FRU) na bynta ka jingsumar, hynrei ki doktor ki la pynbna ba ki la khlad noh shuwa ban poi ha jaka sumar.
Hadien kane, ïa ka met jong ki, la aiti noh sha thanat Margherita ha Assam.
Ki nongshong shnong ka thaiñ ki la kynnoh ba kitei kiba la khlad, la kynnoh ba ki la don bynta ha ki kam tih ‘liew khnai be-aiñ ha Ledo, Assam, ba la kynnoh pynïaid da u nongkhaïi ka thaiñ.
Wat hapdeng ka jingkhang jong ka National Green Tribunal (NGT) bad ki kyndon ba pyrkhing na ki bor pynïaid ka Jylla, ka kam tih ‘liew khnai be-aiñ ka ïai bteng hapoh ka thaiñ.
Ha ka 21 tarik Jylliew, ka kynhun jong 7 ngut na ka ïingdorbar thawaiñ ka Assam ka la pynlong ïa ka jingjurip haba ïadei bad ki kam khaïi dewïong be-aiñ bad kam tih ‘liew khnai ha Tinsukia, kum ka jingban jur halor katei ka mat.
Ka jingjia ba ha shuwa kaba la jia ha ka 25 tarik Jymmang ka kynthup ïa ka jingtwa ha kawei ka jaka tih mar poh khyndew hapdeng Bargolai bad Namdang ha Patkai Hills, hajan khappud Assam-Arunachal Pradesh ha Tinsukia.
Katei ka jingjia ka la ïalam sha ka jingkhlad noh jong 2 ngut ki nongbylla Khasi na Ri-Bhoi District, Meghalaya – John Nongrum na ka shnong Jatah bad Phiniellin Umbah na ka shnong Korhadem.
Kane ka long katkum ka khubor na ka ‘NE NOW’.
