Jowai, Naitung 03
U Myntri Rangbah ka Jylla, u Conrad K Sangma, u la pynbna ba la mang pisa T. 26 klur na ka bynta ban pyndep noh ïa ka jingtei kaba dang sah jong ka Ïawmusiang Market Complex ha Jowai.
Ïa kane u la pynbna ha ka sngi khatduh jong ka lehniam Shad Behdeiñklam ha pung Aitnar ha ka Sngi Balang.
U Myntri Rangbah u la ai khublei ïa ka jingsynñiang jong ka Seiñ Raij Jowai halor ka jingai jaka jong ki na ka bynta ban tei ïa ki jaka ïeng kali ha Jowai Town.
Ha ka jingkren, u Conrad u la ong halor ka jingtei ïa ka Ïawmusiang Market Complex, la don bun ki jyrwit-jyrwat hynrei ka sorkar ka la raikut ban weng ïa kita ki jingeh.
U la ong ruh ba ka projek jong ka Ïawmusiang Market Complex ka la mad shibun ki jingeh hynrei “nga sngewkmen ban pyntip ba ngi la shim ïa ka rai kum ka sorkar ban pdiang ïa ki jingeh baroh.”
U Myntri Rangbah u la pyntip ba ïa ka pisa kaba `26 klur yn bei da ka Sorkar Jylla. “Ka dei ka projek kaba kongsan bha na ka bynta ki paidbah jong ka Jowai bad ka Rilum Jaiñtia bad kane ka projek ka ïajan bha bad nga namar ba la sdang da u kpa jong nga uba la khlad noh bad kumta ngi la kular ban pyndep ïa ka,” la ong u Conrad uba dei u khun ba lai jong u Late Purno A Sangma. U la ong ruh ba la khmih lynti ban pyllait ïa ka ‘tender’ ha kine ar taïew lai taïew ban wan bad u kyrmen ba ka ‘work order’ yn ai sha u kontrator uba dei hok ban ïoh ha kine 60 sngi.
