Shillong, Naitung 03
U MLA ka Mairang bad Chairman ka Meghalaya State Planning Board (MSPB), Bah Metbah Lyngdoh u la phah jingthoh sha u Myntri ka tnad Pule-Puthi ka Jylla, u Rakkam A. Sangma ban shimkhia lem halor ka risol jong ka eksamin Higher Secondary School Leaving Certificate (HSSLC) kaba la phah peit bniah biang da ki samla pule.
U Bah Lyngdoh ha ka jingthoh u la ong ba u la thoh sha u Myntri namar ka jingsngewkhia halor ka mat kaba donkam, kata haba ïadei bad ka risol jong ka eksamin HSSLC 2024, jong ka tnad pule ‘Science’ bad ‘Commerce’. “Nga tharai phi la ïoh jingtip ba hadien ba ki sla thoh jubab jong ki samla pule klas XII-MBoSE ki la shah peit bniah biang sa shisien lyngba ka jingpynbna No.965, Dated 25.06.2024, ka jingpeit bniah biang ka la lap ba katto-katne ki samla pule ki la ïoh pdiang shuh ïa ki ‘mark’ ban ïa kaei kaba ki la ïoh ha shuwa haba la pynbna ïa ka risol ha u Jymmangbad hadien ba la pynbna ‘pass’ bad lah ban pynbha,” la ong u Bah Lyngdoh. U la ong ba katei ka jingpynbna ka wanrah ïa ka mat kaba sngewkhia kaba hap ban pynsngew haba phai sha ki samla pule bad ka lawei haba ïadei bad ka jingpule jong ki. “Ha kajuh ka por, ka long kaba pynduh mynsiem ïa ki kolej kum ka Tirot Sing Memorial College bad ka Mairang Presbyterian Science College hapoh konstitwensi jong nga,” u la ong.
