Jowai, Naitung 03
“Wat la ngi kiew ha ka liang ka roi ka par hynrei ngim dei ban klet pat ïa la ka tynrai bad ki jinglehniam, kum kine ki pynkynmaw ïa ngi ïa ka jingitynnad bad jing-khlaiñ jong ka kolshor jong ngi,” la ong u Myn-tri Rangbah u Conrad K Sangma.
U Conrad u la ong ïa kine ki kyntien haba kyrkhu kyrdoh ïa ki khun ki hajar jong ka Seiñraij Jowai ha ka sngi kut jong ka Behdeiñkhlam ha ka Sngi Balang mynta ka taïew ha pung Aitnar ha kaba da ki phew hajar ngut ki riewngeit na ri Khasi bad Jaiñtia kumjuh na kiwei ki Jylla bad nabar ri ki la wan ban sakhi ïa ka Behdeiñkhlam.
Nalor u Myntri Rangbah ka Jylla la ïadonlang ruh u Myntri ka tnat Tourism Bah Paul Lyngdoh, u MLA ka South Shillong Bah Sanbor Shullai, MLA ka Jowai Wailadmiki Shylla, MLA ka Sutnga Saipung Kong Santa Mary Shylla, ki MDC nalor ki ophisar sorkar, President Seiñraij Bah Hercules Toi bad kiwei kiwei.
Ka jinglehniam Behdeiñkhlam ha ka sngi pynkut, ka la sdang da ka lehniam ‘Kynting Khnong’ ha ïingsah ka Lyngdoh bud sa ka ‘Bam Tyngkong’ bad hadien la pyndep ïa ka lehniam ‘Shoh Thyndai’ ne sympat ïing kaba katkum ka jingngeit ka long ban beh ïa ki ksuid ki khrei, ka pang ka shitom bad ka sniew ka smeh na ïing na sem.
Ïa ka jinglehniam la pyndep da ki shakri niam naduh u Dolloi, ki Sangot, u Chutia nalor u Pator, u Langdoh, ka Langdoh bad kiwei kiwei ki shakri niam ka Raij.
Katba ha ka nohphai sngi la pyndep ïa ka bynta ba kongsan jong ka lehniam Behdeiñkhlam ha Aitnar kaba long ka pung ktieh ba la kyntang. Hangne ki shakri niam hapoh ka jingïalam u pator ki la pynlong ïa ka nguh ka dem ha ka Syiem Aitnar bad pynbud sa ka jingwanrah ïa ka Khnong Blai ha kaba ki khun ka Niamtre ki la hiar ban shad ha pung kyntang.
Ki dong bapher-bapher ba kynthup naduh ka Loomiongkjam, Seiñraij Shillong, Seng Khasi Kmie, Dorbar shnong Chilliangraij (Khon Chnong), Seintyllilang Niamtre Ladthadlaboh, Seiñraij Ummulong, ki Dorbar Shnong Loomkyrwiang, Umshangiar, Dorbar shnong Panaliar, Dulong, Tpep Pale, Loompyrdi Iongpiah bad Ïawmusiang ki la wanrah ïa ki tabut jong ki ha ryngkat ka khubor sha u paidbah.
Ki khun ka Niamtre na ka Shnong Umshangiar, Jowai ki la kyntu ïa ki paidbah jong ka Jylla Meghalaya ba ki dei ban bam smai noh ban ïakhun pyrshah ïa ka jingbamsap shwa ban dier ka por. Ki la kyntu ruh ïa ka Sorkar Jylla halor ka roi ka par da kaba ong ba ka jingroi jingpar jong ka Meghalaya kam dei than ka jingthmu hynrei ka jingkular ïa ki pateng ba hadien.
Ka Niamtre Ïawmusiang ka la ban jur halor ka jingdonkam ban pynneh-pynsah ïa ka um lyngba ka Tabut jong ki. Ha katei ka tabut ki la ong ba lada ki pynjulor ïa ki um ki la pynjulor la ka jingim bad ki dei ban long shi bynta jong ka jubab ym jong ka jingpynjaboh ne jingpyntngit.
Ka Dorbar shnong Loomiongkjam lyngba ka Tabut jong ki, ki la kyntu ïa ki paidbah ba ki dei kamai hok ïa ka spah ka phew ym da ki lad ki lynti kiba bym hok bym suba namar kim lah ban rah ynda ki la ïap.
Katba ka Seiñ Tyllilang Niamtre Ladthadlaboh ki la ban jur halor ka jingdonkam ban pynneh pynsah ïa ka Mei Mariang katba ki riewngeit ka Seng Khasi Shillong ki la ban halor ka jingïatylli.
Mynta ka kynti la wanrah haduh 13 tylli ki ‘Tabut’ ha Aitnar bad hadien ba la wanrah lut baroh ki tabut la pynhiar ïa ka ‘Khnong Blai’. Hadien ka jingshad bad pyni paidbah ïa ki tabut ha pung Aitnar ka la don sa ka lehniam ‘Datlawakor’ hapdeng ka kynhun u Langdoh na Pynthor wah bad ka kynhun u Sangot Paswet na ka Pynthor Neiñ.
Ha kane ka jingïakop kaba 8 minit 27 sekhon ka kynhun u Langdoh ka la jop pyrshah ïa ka kynhun u Sangot Paswet bad la ngeit ba ka rep ka riang kan bha sha pynthor Wah ban ïa ka pynthor Neiñ.
