Shillong, Naitung 03
Ka Ri Bhoi District Sports Association (RBDSA) kan pynlong ïa ki lympung kiba kham pher mynta u snem naduh ki jingïalehkai kynthei haduh ki shynrang kaba long shi bynta ban rakhe ïa ka jingdap 50 snem ne ka Jubili Ksiar.
Kine ki lympung jong ki shynrang ki kynthup naduh ka Super Division, First, Second, Third Division lem bad ka lympung ïalehkai ki kynthei ne ka Women’s League.
Kane ka synjuk ka la thmu ban sdang shwa da ka Women’s League naduh ka taïew khatduh u Naitung mynta u snem, katba ïa ka Third bad ka Second Division yn pynlong ha ka taïew ba-ar u Nailar bad ïa ka First Division la thmu ban pynlong ha taïew nyngkong jong u Nailur.
Kane ka synjuk kan pynlong khatduh ïa ka lympung ïalehkai Super Division kaba don haduh 10 tylli ki kynhun naduh u Nailur mynta u snem.
“Wat la kane ka jingrakhe ïa ka Jubili Ksiar yn pynlong mynta u snem, hynrei baroh ki lympung ïalehkai kin ïaid beit shakhmat ha kaba ïa kine ki lympung yn pynlong ha kylleng ki jaka kata ha madan Umdihar, Nongpoh, Umsning, Nongjri bad ha madan Soh Roman,” la pynpaw u Bah D. Ryntathiang, General Secretary ka RBDSA.
Haba ïadei bad ka Women’ League, u Bah Ryntathiang um pat shym la lah ban pynthikna ïa ka jingdon ki klob ki ban wan shim bynta. “Haduh mynta ngim pat ïoh jingtip ïa ka jingdon ki kynhun, hynrei ngi khmih lynti ba kin khambun ki ban wan shim bynta mynta u snem,” u la bynrap da kaba pynpaw ba ïa ka nam lahduh mynshem snem la rah da ka kynhun na Umroi.
Halor ka pynkhreh pynkhrum ïa katei ka jingrakhe kaba kyrpang, na ka liang ki dkhot nongïalam katei ka synjuk ha ka Lah Sngi U Blei ki la leit ïakynduh ïa u MLA ka Nongpoh Constituency u Bah Mayralborn Syiem na ka bynta ban ïoh ïa ki lad jingïarap na ka Sorkar Jylla.
