Sydney, Naitung:
Ka sorkar synrop jong ka New Zealand ka la pynbna ba kan nang ïaid shakhmat bad ka aiñ ka ban pynlong ïa ki rynsan teknoloji digital ban siew ïa ki kompeni pathai khubor na ka bynta ki khubor.
Ia kane ka aiñ rew (bill) la wanrah ha ka por ba ki kompeni pathai khubor jong ka New Zealand ki ialeh pyrshah ia ki kompeni teknoloji na ka bynta ban pynbna ia ki dollar, kaba la pynlong ia ki ban wad ki lad ki lynti bathymmai ban pynbiang ia ki prokram khubor.
Kumta la ong ba ia ka Fair Digital News Bargaining Bill kaba la wanrah ha u snem ba la leit da ka sorkar barim, yn sa wanrah ha Parliament ha ryngkat ki jingpynkylla ban kyrshan ia “ki kompeni pathai khubor trai ri jong ngi ban ioh khajna na ka bynta ki khubor ba ki pynmih”, la ong u Myntri ka tnad pathai jingtip u Paul Goldsmith.
Nangta ruh u Goldsmith u la ong ba ki jingpynkylla ba la tyrwa kin pyniadei kham bha bad ka ain iasoi digital jong ka Australia.
Katei ka ain, kaba la treikam ha Australia naduh u bnai Risaw jong u snem 2021, ka ai bor ia ka sorkar ban pynbor ia ki kompeni internet kum ka Meta Platforms ka trai jong ka Facebook bad ka Google jong ka Alphabet Inc ban iakren ia ki jingiateh ban pynbiang ia ki jingthoh bad ki lad pathai khubor, lada ki arliang mamla kim lah ban poi sha ka jingiateh halor ka jingsiew.
Ka Meta ka la ong ruh ba katei ka aiñ rew jong ka New Zealand ka la iehnoh ïa ki jingshisha kumno katei ka rynsan ba kyrpang jongka ka treikam, ka jinglong mon sngewbha jong ki, ka jingkwah jong ki nongpyndonkam bad ka dor ba laitluid kaba ka ai sha ki lad pathai khubor.
Hynrei na ka liang ka Google, kam shym la jubab mardor ia ka jingkyrpad ba la pan jingmut haba iadei bad kane ka bynta.
Hadien ba ka Canada ka la wanrah ïa kum kane ka aiñ ha u snem 2023, ka Meta ka la khanglad ïa ki khubor ba kin paw ha ka facebook. Ka Meta ka la ong ruh ba ka thmu ban sangeh ban siew ïa ki kompeni pathai khubor jong ka Australia na ka bynta ki khubor bad ka sorkar ka dang bishar bniah la kan tuklar ne em.
Kumta ha kane ka por, u Goldsmith u la ong ba ki jingpynkylla ba la tyrwa kin ai bor ia u myntri ka tnad pynia- dei ban rai kino ki digital platform ki ban wan hapoh ka ain. Yn thung ruh ia u nongpyniaid ba laitluid kum u nongpyniaid ia kane ka bill.
